Gjykatësi nga Gjykata e Apelit në Manastir, Aleksandar Kambovski është kryetari i ri i Këshillit gjyqësor. U zgjodh unanimisht me 13 vota pro. Kambovski tha se dera e tij është e hapur për të gjithë gjykatës të ndershëm, por jo edhe për të tjerët.
“T’i japim fund kësaj pune, sepse në Maqedoninë kemi rreth 400 gjykatës dhe erdhi koha që t’i heqim nga radhët tanë ata 10-15-20”, tha Aleksandar Kambovski, kryetar i Këshillit Gjyqësor.
Propozimin për Kambovskin e dha kolegu i tij Isamedin Limani. Atë e përkrahu edhe ish kryetarja e Këshillit, Vesna Dameva e cila theksoi se Kambovski angazhohet për reforma sipas rekomandimeve të Misionit vlerësues të BE-së.
“Jep maksimumin e tij që sa më shpejt që është e mundur të zbatohen këto rekomandime, të ndërmerren aktivitete që janë të rëndësishme për të gjithë bashkësinë ndërkombëtare”, shtoi Vesna Dameva, anëtare e Këshillit Gjyqësor.
“Aleksandar Kambovski ka integritet dhe kredibilitet që të luftojë më shumë për pavarësinë financiare të gjykatave”, deklaroi Isamedin Limani, anëtar i Këshillit Gjyqësor.
Pasi u zgjodh, Kambovski nuk i komentoi paralajmërimet e politikanëve të pushtetit se përmes Kuvendit së shpejti do të iniciohet zëvendësim i pesë anëtarëve të Këshillit që janë zgjedhur në Kuvend. Mes tyre është edhe Vesna Dameva e cila dha dorëheqje për shkak të presionit politik.
“Të presim pak, të shohim se çfarë do të ndodhë, nuk do të doja të spekuloja, siç thashë, pres që të veprohet sipas ligjeve dhe Kushtetutës”, pohoi Aleksandar Kambovski, kryetar i Këshillit Gjyqësor.
Zgjedhjen e kryetarit të ri të Këshillit nuk e komentoi as kryeministri Hristijan Mickoski.
“Nuk kam çfarë të them për atë që po ndodh, ja, të shohim se si do të punojë kryetari i ri i Këshillit gjyqësor”, tha Hristijan Mickoski, kryeministër.
Në intervistën e fundit, për shkarkimin e pesë anëtarëve të Këshillit, Mickoski tha se ky organ nuk ka legjitimitet te qytetarët por se qëllimi nuk është të zëvendësohen njëri-tjetrin por anëtarët e rinj të kenë biografi dhe vlerë. Kambovski në lidhje me reformat në gjyqësor, tha se është i gatshëm për t’u takuar me kryeministrin.