Individë të caktuar janë përpjekur të ndikojnë që të mos rritet shumica parlamentare me qëllim që të krijohet krizë institucionale. Kështu tha mbrëmë në ClickPlus zv.kryeministri i parë Artan Grubi.
-Kush ka ndikuar? Individë, prapaskena, kush?
-Edhe individë edhe prapaskena edhe nëntoka. Individë të cilët janë përpjekur të ndikojnë tek Alternativa, tek Aleanca për Shqiptarët fatmirësisht nuk kanë arritur as këtu sepse kishim një marrëveshje shumë të qëndrueshme, tek deputetë të LSDM-së, tek deputetë të BDI-së..
-Por, cili është interesi?
-Interesi është i mosarritjes së shumicës për votimin e Qeverisë të bimë ndër 61 si shumicë parlamentare dhe të krijohet krizë institucionale.
Shumica e re parlamentare që u votua mbrëmë, sipas Grubit do të jetë shumicë e qëndrueshme ndërsa bëri thirrje që opozita të heq dorë nga politikat destruktive.
“Do të formohet një shumicë kompakte, jo shumicë e parcializuar me një, dy apo tre deputetë me pakënaqësi, por një shumicë kompakte e përbërë nga parti politike sepse në parlament duhet parashikueshmëri, duhet qëndrueshmëri. Nuk mund të ketë parlament stabil me shumicë stabile në qoftë se kemi 120 parti”, tha Artan Grubi, zv.kryeministër i parë.
Sipas Grubit kjo shumicë do të sigurojë edhe shumicën e nevojshme për ndryshimet kushtetuese, për të cilat ai është i bindur se janë në rrugë të duhur.