“I bëj thirrje ministrit të arsimit që kjo të bëhet politikë shtetërore në të gjitha komunat, pavarësisht se nga cila parti politike vjen kryetari, të këndohet himni maqedonas.”- deklaroi Hristijan Mickoski kryetar i VMRO DPMNE.
Kështu para disa ditëve kryetari i VMRO-DPMNE-së kërkoi që nëpër çdo shkollë të intonohet himni i Maqedonisë së Veriut.
Për këtë është përgjigjur Kryetari i Tetovës Bilall Kasami. Ai tha se për të ndodhur kjo duhet ose të ndryshohet himni i shtetit sepse, i njëjti nuk reflekton realitetin multietnik, ose në komunat shqiptare të intonohet himni shqiptar.
“Ne e dimë që himni i shtetit nuk reflekton realitetin multietnik të shtetit dhe shoqërisë në Maqedoninë e Veriut. Përderisa është ky realitet, atëherë ne kërkojmë, këtë qëndrim e kam dhënë fillimisht si Kryetar I Komunës së Tetovës nuk është që është koordinuar me partitë tjera, atëherë kjo nënkupton që ose duhet të ndërrohet himni i shtetit dhe të respektojë diversitetin kulturor dhe etnik ose nëse vihet vendim që nëse kështu si është të intonohet, atëherë duhet të respektohet përkatësia multietnike e shtetit dhe e shoqërisë.”- deklaroi Bilall Kasami Kryetar I Lëvizjes Besa.
I pyetur nëse do të marrin një iniciativë të tillë për të ndryshuar himnin, Kasami tha se prioritet është të hiqet 20% nga kushtetuta, si term fyes për gjuhën shqipe.