Mesazhe gabimisht të adresuara nga “Temini im” dhe “Vaksinacija” po marrin dhjetëra qytetarë ku u bëhet thirrje për tu vaksinuar. Qytetarët në huti, nuk dinë se ku duhet të lajmërojnë pasi u është dërguar mesazh i gabuar. Për të mos u “djegur” termini për vaksinim shumica qytetarëve mesazhet e tilla i postojnë në Facebook me shpresë se personi për të cilin është termini të vaksinohet.
“Mesazhi më është dërguar gabimisht, në qoftë se e njihni Ljubisha B që me shumë gjasa është nga Tetova, tregoni se ka marrë termin për vaksinim”.
“Vajza ime nuk është e lajmëruar për vaksinim, ka marrë një mesazh që i referohet Sllavço R. pika e vaksinimit në Kavadar. Ju lutemi jepni informacione nëse e njeh dikush që ta shfrytëzojë terminin”.
Nga ana tjetër, Filipçe siguron se terimet e qytetarëve mund të korrigjohen nga mjeku amë. Por nuk sqaroi se përse u vijnë mesazhe të gabuara personave për tu vaksinuar që fare nuk kanë aplikuar për vaksinim.
“Jo. Ajo varet prej mënyrës së aplikimit dhe vendit ku janë lajmëruar. Në përgjithësi nëse është në grupin e të moshuarve ajo mund të korrigjohet dhe të vaksinohet”, deklaroi Filipçe.
Ndryshe po vazhdon akoma kaosi në sistemin për aplikim dhe rishpërndarje për vaksinim. Shumë qytetarë disa ditë me radhë po reagojnë, duke thënë se edhe pse kanë aplikuar për t’u vaksinuar në qytetin në të cilin jetojnë, megjithatë terminin ua kanë caktuar në qytetet tjetër. E Ministria e Shëndetësisë thotë se qytetarët lirisht mund të vaksinohen në vendbanimin e tyre.