Kamera brenda seancave gjyqësore me interes publik për të rritur transparencën e proceseve gjyqësore në Maqedoninë e Veriut. Kjo ishte një ide e iniciuar që në vitin 2018, por që ende nuk është realizuar. Për këtë u formua edhe Këshilli gjyqësor-mediatik.
Për t’i dhën shtysë procesit ishte kujdesur vetë Ambasada e SHBA-ve në Shkup, përmes gazetares Rashel Kohen, e cila si bashkëthemeluese e Komiteti Gjyqësor-Mediatik të Masaçusetsit, thoshte se gjykatat e hapura janë forma më e mirë për të rritur besimin e publikut tek gjyqësori.
“Kur them hapje e gjykatave, e kam fjalën për hapjen e tyre për kamerat, për të gjitha pajisjet elektronike kështu që gazetarët tanë kanë pasur mundësi për të “tweetuar” dhe shkruar nga brenda sallës së gjyqit”, tha Rashel Kohen – Komiteti Gjyqësor-mediatik Masaçusets.
Po çfarë është bërë këto dy vite për ta arritur këtë gjë në vendin tonë?
Hristina Bellovska është gazetare që ndjek gjyqësorin, e njëkohësisht edhe nënkryetare e Këshillit gjyqësor-mediatik. Pohon se është bërë pak nga pritshmëritë, por gjithsesi nuk është më si më parë kur gazetarët as telefonat nuk guxonin t’i mbanin në sallën e gjyqit.
“Për momentin kemi analizë dhe bëhen grupe të punës nga gazetarë dhe gjykatës që do t’i analizojnë ligjin për procedurë penale, Rregulloren e gjyqit dhe Ligjin për gjykatat sepse aty janë nenet kyçe që duhet të ndryshohen që të mund të informojë dhe në pjesën më të madhe të proceseve gjyqësore të mund të hyjmë me kamera, që të mos jetë incizim vetëm disa sekonda me inserte nga brenda dhe të kemi qasje në më shumë dokumente gjyqësore”, theksoi Hristina Bellovska – Nënkryetare e KGJM.
Pritshmëritë e Bellovskës janë që të paktën deri në fund të vitit 2021 të jetë arritur diçka në këtë drejtim, duke nisur nga kompromisi brenda Këshillit gjyqësor-mediatik.
“Sa i përket pjesës së votimit, do ta marrim këtë mbështetje, megjithatë më tej shkon në Ministrinë e Drejtësisë, pastaj në Kuvend. Varet sa do të ketë edhe vullnet politik që të zbatohet kjo edhe pse shoh se Ministria e Drejtësisë, mes subjekteve të tjera, vazhdimisht lëvdohet dhe kanë premtime politike se gjyqësori do të jetë më transparent, se do të hapen, ja ku janë ato ndryshime që duhet të bëhen, ata vetëm duhet t’u ndihmojnë gjykatave në lidhje me digjitalizimin”, tha Hristina Bellovska – Nënkryetare e KGJM.
Përveç infrastrukturës që duhet ndërtuar, me kamera dhe personel që do të kujdesej për mbarëvajtjen teknike të regjistrimeve në seanca gjyqësore, duhet gjetur zgjidhje edhe me pjesën kur në seancë ka procedurë dëshmimi. Kjo nënkupton se jo gjithçka mund të regjistrohet dhe transmetohet, sepse mund të dëmtojë procesin gjyqësor, duke qenë dëshmitarët kur flasin, nuk duhet të dëgjojnë deklaratat e njëri-tjetrin.