Kamçevi me padi penale kundër gjykatësve që e shqiptuan paraburgimin

TË FUNDIT

Avokati i Jordan Kamçev, Toni Menkinovski, akuzon se ka keqpërdorim të shërbimeve sekrete që qytetarëve t’u montohen raste.

Ai ngriti padi penale kundër gjykatësit të procedurës paraprake dhe Këshillit Penal të cilët para 5 ditëve vendosën për vazhdimin e masës së paraburgimit. Menkinovski në letrën për mediat shkruan se paraburgimi është shqiptuar në bazë të një dëshmie gojore të një informatori dhe se deri më tani, para tyre si palë mbrojtëse nuk është prezantuar asnjë shënim i përpiluar nga ana e shërbimit sekret, respektivisht nga Agjencia për Siguri Kombëtare, që paraqet shkelje të të drejtave të klientit të tij.

Mes të tjerësh, në letrën është nënvizuar se në vendimin e Gjykatës Penale thuhet se Kamçevi në shkurt të këtij viti është takuar me një zyrtar të inteligjencës së Bullgarisë, pjesëtar i shërbimit për siguri, me të cilin paraprakisht ka bashkëpunuar dhe se supozohet se Kamçevi do të ketë mbështetje që të arratiset në Bullgarinë fqinje.

“Interpretimi i tillë i Gjykatës është i turpshëm dhe ofendues për Jordan Kamçevin. Ai është afarist maqedonas, i cili të gjithë kapitalin e ka në Maqedoni”, shtohet në letrën e Menkinovskit, duke shtuar se Kamçevi asnjëherë nuk ka qenë, e as nuk e ka pasur ndërmend të bëhet bashkëpunëtor i ndonjë shërbimi të huaj.