Me kalldrëme e vende-vende e arnuar me asfalt.
Kjo është rruga që të dërgon tek spitali fëmijëve Kozle.
Tash e dy vjet kryetari i Karposhit po premton se do ta rregullon. TV21 disa herë ka raportuar për këtë rrugë, ndërsa nga Komuna janë përgjigjur se për shkak motit të lig punimet nuk po fillojnë.
Çfarë tha kryetari Bogoev në vitin 2019.
“Tani me ardhjen e pranverës dhe ngritjen e temperaturës së ajrit, na mundësohet që shpejtë, nuk dua të tingëllojë keq, por le të themi se në muajin qershor më së fundi do të përfundojë”, deklaroi Stefan Bogoev, kryetar i Karposhit.
Edhe në vitin 2020 tha se po e pengojnë kushtet e motit.
“Shpresoj që kur do të bëhen kushtet, do të mund edhe ajo të rikonstruohet.Duke pasur parasysh edhe po na diktojnë edhe kushtet e motit”pohoi Stefan Bogoev, kryetar i Karposhit
Erdhi pranvera e viti 2021, por në këtë rrugë nuk u ndryshua asgjë.
“Jemi 3 Maj, 2021 temperatura është 21 gradë.Edhe pse pati premtime se kur do të rregullohet koha do të rregullohet edhe rruga që të dërgon tek spitali i fëmijëve në Kozle, por kjo gjë ende nuk ka ndodhur”.
Kontaktuam edhe me kryetarin e Karposhit Stefan Bogoev, por tani ka një përgjigje tjetër.
“Për rrugën ka marrëveshje për bashkëpunim ndërkomunal në mes Komunës së Karposhit dhe Qytetit të Shkupit. Qyteti shumë shpejt do të filloj ta ndërtojë”, tha Stefan Bogoev, kryetar i Karposhit.
Ndryshe kjo rrugë është mjaftë e frekuentuar, pasi rreth 100 fëmijë në ditë kontrollohen në spitalin për sëmundje të mushkërive për fëmijë Kozle.
E kjo rrugë për të cilin u premtua gati 3 vjet, është vetëm 500 metra e gjatë.