Përfaqësuesja e lartë e Unionit, Kaja Kalas paralajmëroi se do të angazhohet me qeveritë e Serbisë, Kosovës dhe Maqedonisë për rrugën e tyre drejt BE-së. Ajo ka nisur vizitën e tre vendeve dhe nga Beogradi porositi se Ballkani perëndimor duhet të punojë për realizimin e qëllimit për një Europë të bashkuar.
“Unë jam tërësisht e përkushtuar që t’i inkurajoj të gjitha vendet e Ballkanit perëndimor që ta shfrytëzojnë momentin për zgjerim. Po, ky proces po zgjat një kohë të gjatë, por gjithmonë ka një momentum politik dhe ky momentum është pikërisht tani. “Europa e bashkuar” është vizion për të cilin të gjithë së bashku duhet të punojmë”, tha Kalas.
Kalas nesër vjen për vizitë në Shkup në takim me kryeministrin Hristijan Mickoski. I pyetur për pritshmëritë e tij, kryeministri theksoi se do të kërkojë mënyra për zhbllokim të procesit eurointegrues. Sipas tij, duhet të ndërtohet besim me Bullgari dhe se ai nuk ka problem për ndryshimet kushtetuese, por ka problem, siç tha, të pranojë ultimatume.
“Jam i bindur se do të gjenden zgjidhje, do të gjenden mekanizma në BE që Maqedonia ta marrë vendin që meriton dhe të jetë pjesë e asaj tryeze, sepse që moti e merituam atë”, tha Mickoski.
Paraprakisht, presidentja Gordana Siljanovska Davkova paralajmëroi se ka mundësi që me ndërmjetësim të Këshillit të BE, ajo të takohet me homologun e saj bullgar, Rumen Radev për të biseduar mbi këtë temë. Në mënyrë shtesë, ndërmjetësim ofruan Austria dhe Mbretëria e Bashkuar. Përndryshe, Kalas në Shkup do të marrë pjesë edhe në dialogun për siguri dhe mbrojtje mes BE-së dhe Maqedonisë.