Dy blloqet politike shqiptare, VLEN dhe Fronti Europian, sigurojnë se nuk do të bëhen pjesë e një koalicioni qeverisës nëse partneri i koalicionit nuk i pranon ndryshimet kushtetuese. Kandidati për president nga Fronti Europian, Bujar Osmani madje thotë se ka një dokument të nënshkruar nga krerët e partive politike, që nuk do të formojnë koalicion për qeverisje, pa i bërë më parë ndryshimet kushtetuese. Sipas Osmanit, shtetit nuk i duhet një qeveri që do ta mbajë vendin në izolim.
“Dokumenti ekziston dhe është obligim i partive politike se ndryshimet kushtetuese janë çështje kyçe që të mund të hyhet në çfarëdo koalicioni qeverisës të partive politike, sepse me të vërtetë nuk ka kuptim të ketë Qeveri të një shteti në izolim. Qeveri e një shteti pa negociata, qeveri e një shteti ku vlerat europiane ta kalojnë kufirin këtu”, pohoi Bujar Osmani, kandidat për president – Fronti Europian.
Megjithatë, kandidati i VLEN-it për president, Arben Taravari, nuk e konfirmon se ka një dokument të nënshkruar. E përsëritë se ka vetëm një marrëveshje xhentëlmene dhe për këtë çështje është biseduar. Taravari siguron se VLEN nuk do të bëhet pjesë e një qeverie që nuk ecë drejt rrugës europiane.
“Unë po e përsëris se kemi një marrëveshje xhentëlmene, kemi biseduar. Për ne, ju sigurojmë se nuk bëhemi pjesë e një koalicioni që nuk shkon rrugës së Europës dhe nuk ka garanci më të fuqishme se sa VLEN-i në Qeverinë e ardhshme, sepse VLEN-i do të jetë pjesë e qeverisë së ardhshme. Nuk ka garancë më të fuqishme se do ta ecim rrugën europiane”, tha Arben Taravari, kandidat për president – VLEN.
Ndonëse këto kushte janë të dedikuara për VMRO-DPMNE-në, nga kjo parti edhe më tej refuzojnë të votojnë ndryshimet kushtetuese, siç i quajnë, nën diktat bullgar. Vllatko Gjorçev në Daily Click, tha se këto ndryshime nuk i duan as qytetarët e Maqedonisë.
“Nuk do të ketë ndryshime kushtetuese nën diktat bullgar. Kjo është ajo që u themi qytetarëve të Maqedonisë. Kjo është ajo që qytetarët e mbështesin. Kjo është që thuhet në të gjitha anketat dhe në fund të fundit, neve “x” herë na është thënë edhe nga Zoran Zaev, edhe nga Stevo Pendarovski, edhe nga Kovaçevski edhe nga të tjerët, se nëse ndryshohet emri, të gjitha çështjet janë të mbyllura. E shohim se nuk është ashtu”, deklaroi Vllatko Gjorçev – VMRO-DPMNE.
Përndryshe edhe kryetari i Lëvizjes Demokratike Izet Mexhiti, dje siguroi se nuk ka një dokument të tillë të nënshkruar. Ai sfidoi Osmanin që të publikojë dokumentin për të cilën thotë se ekziston. Nëse nuk e bën, Mexhiti tha se kjo do të ishte gënjeshtra më e madhe në karrierën e Osmanit.