Jovanoviq: Qumështi në Maqedoni, më i shtrenjtë se në Austri! Ademi: Qeveria të kufizojë marzhën e fitimit dhe jo çmimin final

Masa e Qeverisë për ngrirjen e çmimeve është e vonuar, por më mirë vonë se kurrë thotë ekonomisti Branimir Jovanoviq. Sipas tij është më se e arsyeshme që çmimet e produkteve bazë të ngrijnë, me qëllim që Qeveria të parandalojë rritjen e inflacionit.

“Nuk mund qumështi në Maqedoni të jetë më i shtrenjtë se në Austri. Në Maqedoni momentalisht një litër qumësht është 80 denarë ndërsa në Austri 1 euro e 25 cent. Nuk ka asnjë arsyetim ekonomik. As rryma nuk është më e shtrenjtë, as pagat, as tatimet. Nëse Qeverisë nuk ia ndien për të varfrit, nëse ata kanë apo nuk kanë për të ngrënë dhe u mundësojnë vetëm firmave të realizojnë fitime të mëdha atëherë urdhëroni, mos i ngrini çmimet dhe do të shohim pastaj ata që janë të pasur do të bëhen edhe më të pasur ndërsa ata që janë të varfër do të ngelen të uritur”, deklaroi Branimir Jovanoviq, ekonomist.

Jovanoviq shton se ngrirja e çmimeve nuk do të ndikonte negativisht tek fitimi i kompanive siç pretendojnë ato. Nga ana tjetër, ekonomisti Visar Ademi thekson se në ekonominë e tregut çmimet përcaktohen nga oferta dhe kërkesa, ndërsa ndërhyrja e Qeverisë mund të shkaktojë shkatërrim të tregut. Sipas tij qytetarët kanë nevojë për politika zhvillimore dhe jo masa që nuk sjellin dobi afatgjata.

“Masa ideale do të ishte kontrollimi i marzhës së fitimit të këtyre kompanive dhe jo çmimi final, thash edhe njëherë është ndërhyrje arbitrare, por të kontrollohen marzhat e këtyre kompanive. E dyta ju nuk mund ta limitoni bukën ndërkohë që produktet tjera siç janë energjia elektrike, nafta t’i ndani sipas çmimit të tregut të bursës. Ju duhet të ndërhyni edhe atje sepse këto janë elemente që qytetari i thjeshtë më tepër i ndjen”, pohoi Visar Ademi, ekonomist.

Ademi shton se marzha e fitimit në këto kompani është shumë e lartë, ndërhyrja e Qeverisë sipas tij është e vështirë pasi që ato mbahen nga oligarkë që e financojnë politikën.

Përndryshe, Ministri i Ekonomisë Kreshnik Bekteshi ka paralajmëruar që përpos çmimit të bukës deri në fund të javës do të sillet vendim edhe për ngrirje të çmimeve të qumështit dhe disa produkte të tjera.