Bullgaria nuk vendos kushte shtesë në rrugën e Maqedonisë drejt BE-së, siguron nënpresidentja bullgare Ilijana Jotova. Sipas saj, marrëdhëniet dypalëshe mes dy shteteve nuk janë pengesë për rrugën eurointegruese por kriteret europiane nga propozimi francez.
“Ne vazhdojmë të mendojmë se nuk janë të mbrojtura të drejtat e bullgarëve në Republikën e Maqedonisë së Veriut. Kjo kornizë është dokument europian, sado që të ketë përpjekje që të prezantohet si çështje me karakter dypalësh, ky dokument tashmë është europian i cili duhet të respektohet, i njëjti nuk mund të rishkruhet, të hiqen pjesë prej tij ose të injorohet”, tha Ilijana Jotova – nënpresidente e Bullgarisë.
Zëvendësministri i punëve të jashtme Zoran Dimitrovski e mirëpriti deklaratën e Jotovës se Bullgaria nuk ka kushte shtesë, por tha se problemi qëndron në kushtet aktuale. Sipas tij, shqetësimi nuk është për shkak të vendosjes së bullgarëve në Kushtetutë.
“Ajo që na frikëson është se procesi ynë aderues drejt BE-së do të jetë në tërësi dypalësh dhe do të varet nga rezultatet e punës së Komisionit për çështje historiane dhe arsimore”, u shpreh Zoran Dimitrovski – zëvendësministër i Jashtëm.
Eurokomisarja Marta Kos në forumin e liberalëve europianë i përkushtuar Ballkanit Perëndimor, theksoi se politikanët aktualë europianë kuptojnë se zgjerimi sjell paqe dhe i thirri vendet kandidate ta përshpejtojnë këtë proces.
“Ne punojmë për t’i përshpejtuar negociatat dhe tashmë shohim avancim, gjë që para disa vitesh ishte vështirë që të paramendohet. Gjatë kësaj jave hapëm edhe një klaster negociues me Shqipërinë”, deklaroi Marta Kos – Eurokomisare për Zgjerim.
Kohë më parë Kos paralajmëroi se do të bisedojë me politikanët e Maqedonisë për rrugën eurointegruese pasi takohet me kreun shtetëror të Bullgarisë. Kryeministri Rosen Zhelaskov tha se e ardhmja europiane e Ballkanit Perëndimor është garancia për paqe duke shtuar se zgjerimi është edhe në interes të Bullgarisë.