Ministria e Arsimit dhe Shkencës po informon drejtorët e shkollave fillore dhe të mesme për llojin e kompjuterëve dhe me çfarë konfigurimi minimal duhet të jenë për punë në Platformën kombëtare për mësim në distancë. Pavarësisht faktit se vendimi i tillë shkaktoi konfuzion midis mësuesve dhe prindërve, Ministria përkatëse qetëson dhe siguron se bëhet fjalë për konfigurime që nuk do të jenë problem për mësimin online.
“Me qëllim që të sigurohen me kohë pajisjet e nevojshme për organizim të mësimit përmes platformës online, MASH para një periudhe të caktuar informoi për konfigurimet e rekomanduara minimale për mbajtje të mësimit përmes Platformës kombëtare për mësim në distancë. Platforma funksionon drejtpërdrejt në një ueb-shfletues (Chrome, Microsoft Edge, Safari) dhe nuk duhet të instalohet asnjë softuer shtesë. Karakteristika minimale e një kompjuteri i cili do të përdorë vetëm ueb-shfletues për të hyrë në platformë , është të ketë minimum 4 GB memorie dhe një procesor me dy bërthama. Për të marrë të gjitha funksionalitetet e Platformës online, duhet të ketë sistem operativ Windows 8.1”, thonë nga Ministria e Arsimit.
Sa i përket pajisjeve që duhet t’i posedojnë nxënësit, sipas sondazheve të bëra, nga ministria thonë se bëhet fjalë për pajisje të cilat i posedojmë shumica e familjeve, sepse platforma është përshtatur të funksionojë edhe në desktop, edhe në lap-topë, edhe në tableta, edhe në smart telefona.
Dje, ministrja e Arsimit dhe Shkencës, Mila Carovska, prezantoi platformën për mësimin online. Nxënësit do të mund përmes kompjuterit apo celularit ta shohin klasën dhe mësimdhënësin dhe do të mund t’i shfrytëzojnë të gjitha audio-materialet dhe videot e vendosura në platformën në fjalë. Do të ketë kuize, teste dhe përmbajtje të ndryshme inovative.
“Platforma praktikisht do t’u lejojë nxënësve dhe arsimtarëve së bashku ta avancojnë arsimin tonë. Jo vetëm për tani, por edhe për të ardhmen. Dhe kjo është një vlerë e madhe me rëndësi të jashtëzakonshme për vendin tonë dhe procesin tonë arsimor”, deklaroi Milla Carovska – Ministre e Arsimit.
Nga Ministria thotë se obligimi i të gjitha komunave dhe shkollave është të sigurojnë internet dhe pajisje përmes të cilave mësuesit mund të japin mësim. Gjithashtu, plani dhe protokollet parashikojnë mundësinë e organizimit të mësimit me prezencë fizike edhe për klasat e larta, vetëm nëse i plotësojnë kushtet dhe nëse këtë e lejon situata epidemiologjik, gjë për të cilën paraqitet kërkesa në Komisionin qeveritar. Shumë shkolla rurale kanë numër të vogël fëmijësh, kështu që ata do të mund ta organizojnë mësimin me prezencë fizike, për çka sërish duhet të vendosë Qeveria. Sipas protokolleve dhe planit, Ministria e Arsimit dhe Shkencës siguron mësim edhe për fëmijët që nuk kanë pajisje për ndjekje të mësimit online.