Vetëm ndërtimi i hekurudhës së shpejtë nga Tabanovca deri në Gjevgjeli do të kushtojë rreth 2 miliardë euro, por do të nevojiten më shumë para për të blerë trena të rinj, ndërsa do të kushtojë edhe shpronësimi i tokës. Këtë e deklaroi në emisionin “Biznes 21” drejtori i Hekurudhave “Infrastruktura”, Sinisha Ivanovski, duke treguar se nuk ka një vlerësim se sa do të jetë i gjithë investimi në total. Ivanovski gjithashtu nuk ka informacion për normën e interesit të huamarrjes prej 2 miliardë eurove të marrë nga Mbretëria e Bashkuar për hekurudhën.
“Nga aspekti i drejtori t të infrastrukturës, unë i përmbahem fushës që mbuloj dhe nuk kam njohuri personale për kreditë dhe huamarrjet. Supozoj se Ministria e Financave, së bashku me Ministrinë e Transportit, e udhëheqin procesin”, tha Sinisha Ivanovski.
Hekurudha për në Bullgari, pas 30 viteve, është ende e bllokuar. Ivanovski nuk tha nëse dhe kur do të përfundojë. Ajo që dihet është se rreth 800 milionë euro do të paguhen për tre pjesët e projektit.
“Atë që unë e bëj për momentin atje ku ka ndërtime jocilësore, unë kërkojë që t’i shembin. Le të kushtojë sa do të kushtojë, le t’i shembin”, deklaroi Ivanovski.
Por problem i madh për Hekurudhën, sipas drejtorit mbetet i njëjtë – shënjestër e vjedhësve.
“Ka shumë kabllo përreth binarëve. Ata që vjedhin gërmojnë nga një metër nën tokë dhe nga 8-9 kabllo, e marrin pikërisht atë që është nën tension elektrik. Si e dinë se nuk është? Si e dinë? Andaj po e them se është krim i organizuar”, tha ai.
Ivanovski paralajmëroi se do të kërkojë ndryshime të Kodit Penal për sanksione më të rrepta për vjedhësit që e rrezikojnë sigurinë në trafikun hekurudhor.