Dy ish-kryeministra izraelitë, Naftali Bennett dhe Yair Lapid, njoftuan sot se do të bashkojnë forcat në zgjedhjet e ardhshme në një përpjekje të përbashkët për ta mposhtur kryeministrin afatgjatë Benjamin Netanyahu, përcjell TV21.
Naftali Bennett dhe Yair Lapid ishin kryeministra sipas marrëveshjes së rotacionit për një qeveri koalicioni që e formuan në vitin 2021. Tani, të dy planifikojnë t’i bashkojnë partitë e tyre në një formacion të vetëm të udhëhequr nga Bennett.
“Ky hap synon të unifikojë bllokun për t’i dhënë fund përçarjeve të brendshme dhe për t’u fokusuar në fitimin e zgjedhjeve të rëndësishme të ardhshme”, thuhet në deklaratën e partisë “Yesh Atid” të Lapidit.
Në vitin 2021, marrëveshja e koalicionit mes Bennett dhe Lapid i dha fund 12 viteve të qeverisjes së Netanyahu-t. Bennett u bë kryeministër në vitin e parë, por koalicioni u shpërbë. Më pas, Lapid shërbeu si kryeministër i përkohshëm për gjashtë muaj, derisa zgjedhjet e reja e rikthyen Netanyahu-n në pushtet.
Lapid mbeti lider i opozitës, ndërsa Bennett u tërhoq nga politika.
Të dy politikanët kanë dallime ideologjike. Bennett është një hebre ortodoks me qëndrime të ashpra ndaj palestinezëve, ndërsa Lapid është laik dhe konsiderohet më i moderuar.
Aleanca e tyre tani synon të bashkojë opozitën e fragmentuar, e cila ka pak të përbashkëta përveç kundërshtimit të përbashkët ndaj Netanyahu-t.