Pavarësisht fushatës intensive për vaksinim, edhe me fotografi si kjo, duke dhënë vaksina në rimorkio traktori, procesi i imunizimit nuk po ecën sipas pritshmërisë. Javë më parë, Ministri i Shëndetësisë pohoi se vendi ka kapacitet që të vaksinojë nga 10 deri në 15 mijë qytetarë në ditë. Po me sa duket ky plan nuk po realizohet dot. Interesimi i qytetarëve është dukshëm më i vogël. Prandaj edhe nisi vaksinimi në terren, arsyetohet i pari i shëndetësisë, duke paralajmëruar kufizime në vjeshtë.
“Të vetëdijshëm se ndoshta edhe përskaj gjithë asaj që bëjmë, interesi nuk do të rritet, andaj mendojmë për ndonjë formë restrikcione. Ne, e askund në botë, nuk mund të bëjmë… vaksinimi nuk është me detyrim dhe më lejoni të konstatoj, për fat të keq, andaj duhet të mendojmë edhe për disa zgjidhje të tjera alternative, për shembull, pjesëmarrja në ngjarje me shumë njerëz, në të mbyllur ose në të hapur, në kinema a ngjarje kulturore, vetëm me certifikatë të tillë dhe kjo është diçka që mund ta propozojmë nga muajt e vjeshtës”, tha Filipçe.
Mes 70 deri në 85% të vaksinuar do të ishte numër i kënaqshëm për të krijuar imunitet kolektiv, u shpreh Filipçe, i cili pret që deri në fund të këtij muaji me të paktën 1 dozë të vaksinohen gjithsej 500 mijë qytetarë, e përafërsisht kaq edhe të rivaksinuar.
“Diku 30% në 2 ditët e fundit, nga numri i përgjithshëm i të vaksinuarve, janë vaksinuar në teren dhe këtë sistem e vazhdojmë edhe më tej me sistem të rotacionit. Rreth 430 mijë qytetarë janë tashmë të vaksinuar, 250 mijë janë rivaksinuar. Vazhdojmë edhe më tej me punë intensive, edhe në terren edhe me apele të thërrasim qytetarët të vaksinohen, kjo është mënyra e vetëm të shpëtojmë nga vala e re eventuale dhe po mendojnë rreth asaj se si do të mund të funksionojmë në muajt e vjeshtës”, shtoi ai.
Vaksinimi vazhdon në të gjitha pikat e vendit, në sallat e mëdha dhe pikat e vaksinimit në qytete, si dhe në terren, pa termin. Do të mund të vaksionohen edhe fëmijët mes moshës 12 deri 16 vjeç, vetëm me vaksinën “Fajzer”, e për këtë termin do të duhet të bëjnë prindërit.