Incidenti në futbollin e të rinjve, FFM dhe Klubet dënojnë dhunën në Shtip

Personi me inicialet A.A. (43 vjeçar) është arrestuar pas incidentit në ndeshjen e të rinjve në Shtip mes Bregallnicës dhe FC Shkupit. Ndaj tij Prokuroria Themelore Publike në Shtip ka hapur procedurë të menjëhershme veprën penale – “Dhunë”.

“Ngjarja ka ndodhur në minutën e 89-të të ndeshjes, kur gjyqtari për një faull i tregoi djalit të të dyshuarit kartonin e dytë të verdhë dhe e përjashtoi nga loja. I pakënaqur me vendimin, fillimisht djali reagoi në mënyrë josportive duke tentuar të sulmojë me grushta dhe me goditje me këmbë një nga futbollistët e “Bregallnicës””, thanë nga PPTh-ja.

Federata e Futbollit e Maqedonisë e ka dënuar ashpër incidentin. Nga atje thonë se një sjellje e tillë është e papranueshme dhe përbën shkelje të rëndë të frymës sportive.

“FFM njofton se organet kompetente do të hapin procedurë disiplinore dhe do të marrin masa të përshtatshme ndaj autorëve të incidentit. Do të nisë procedurë disiplinore edhe kundër FC Shkupit dhe personave përgjegjës, me qëllim që një sjellje e tillë e papërshtatshme dhe e rrezikshme të mos përsëritet kurrë më”, thanë nga FFM-ja.

FC Shkupi përmes kësaj komunikate informoi opinionin se distancohet plotësisht nga ngjarjet josportive që kanë ndodhur në qytetin e Shtipit.

“Futbolli nuk është dhe nuk duhet të jetë arenë konfrontimesh fizike, por një fushë ku ballafaqohen talenti, taktikat dhe mentaliteti sportiv. Njëkohësisht, ne apelojmë tek të gjitha organet kompetente që të marrin masat e nevojshme në bazë të matrialeve dhe fakteve, duke siguruar që të gjithë personat e përfshirë në këtë incident të përballen me ligjin dhe të mbajnë përgjegjësi për veprimet e tyre”, tha Shkupi.

Reagoi edhe FC Bregallnica, e cila po ashtu e dënoi ashpër incidentin

“Për ne është absolutisht e palejueshme që një prind apo kushdo tjetër të jetë arsyeja që fëmijët e vegjël të përfundojnë të lënduar në një ndeshje. Nuk guxojmë të lejojmë që një pamje e tillë të përsëritet në asnjë fushë futbolli apo sportive”, tha FC Bregallnica.

Thuhet se një prind i një futbollisti ka hyre në fushë dhe ka sulmuar fizikisht futbollist tjerë duke u shkaktuar lëndime. Menjëherë pas sulmit, zyrtarët policorë të SPB Shtip e kanë privuar nga liria, ndërsa të miturit janë dërguar në Spitalin Klinik të Shtipit për të marrë ndihmën e nevojshme.