Komisioni Shtetëror i Zgjedhjeve ka miratuar Udhëzimin për zbatimin e Zgjedhjeve Lokale 2025. Votimi do të jetë personal dhe i njëhershëm, me identifikim përmes letërnjoftimit ose pasaportës, dhe do të mund të votojnë edhe personat me dokument që u ka skaduar pas shpalljes së zgjedhjeve, përcjell TV21. Para marrjes së fletës së votimit, votuesit do të kontrollohen me pajisje për identifikim biometrik të gishtit të madh të dorës së djathtë.
Votimi do të jetë i fshehtë, pas paravanit dhe me stilolaps blu, ndërsa fotografimi, votimi në grup ose familjar janë rreptësisht të ndaluara. KSHZ ka akredituar nëntë vëzhgues të rinj – pesë të huaj dhe katër vendas – dhe informon se afati për paraqitje përfundon nesër. Kryetari i KSHZ-së, Boris Kondarko, theksoi se Komisioni nuk ka kompetenca mbi rregulloren për reklamimin politik të paguar dhe se çështja është dërguar në Kuvend për sqarime shtesë./tv21.tv