Humori i keq i Spasovskit! Socialdemokratët dhe integristët sqarohen për ngjarjen në MPB

Humori pa kripë i Ministrit të Brendshëm Oliver Spasovski, solli në interpretimet e ndryshme në opinion momentin kur ai tha se zëvendësit të tij Nazim Bushi se nuk guxon të flasë sepse është gjobitur për mosmbajtje të maskës. Për t’u sqaruar se nuk kishte ndonjë qëllim të keq, Spasovski ka komunikuar me zëvendëskryeministrin e parë Artan Grubi.

Artan Grubi: “Duke e njohur humorin e tij, i cili nuk është shumë i spikatur…

Fatmir Aliu: Mos më thoni se ky është humor, ju lutem…

Artan Grubi: “Po nuk është shumë i spikatur…U sqarua qysh atë ditë në telefonata me të gjithë ne, sepse u ngrit në goxha nivel kjo çështje”.

Fatmir Aliu: Nga kush?

Artan Grubi: “Nga unë. Për arsye të raportimeve…”.

Fatmir Aliu: D.m.th nuk paskeni qenë i kënaqur…?

Artan Grubi: “Absolutisht jo”.

Edhe Ministri Spasovski, mbrëmë në një emision, sqaroi se nuk ka pasur ndonjë qëllim të keq dhe se mediat i dhanë kahje të tillë.

 “Po ishim në preskonferencë. Nuk bëhet fjalë për asnjë lloj ndalese për të folur. Mendoj se konteksti që i ishte dhënë nga disa media, nuk është konteksti i vërtetë”, deklaroi Oliver Spasovski – Ministër i Punëve të Brendshme.

Rastësisht ose jo, nuk kaloi një ditë pas kësaj ngjarjeje, Spasovski dhe Bushi u gjendën në kabinetin e zëvendëskryeministrit të parë Artan Grubi. Zyrtarisht u kumtua se është folur për shpërndarjen e nëpunësve administrativ të punësuar sipas programit K5, por mes tjerash u shkrua edhe se Ministri dhe zëvendësministri “shprehën gatishmërinë për bashkëpunim dhe për sukses të përbashkët”, që duket si justifikim për ndodhinë e një dite më pare.