Hillary Clinton mbështet Bidenin në garën për president

Ish-kandidatja demokrate, që ka garuar për pozitën e presidentes në Shtetet e Bashkuara, Hillary Clinton ka mbështetur Joe Bidenin në zgjedhjet presidenciale të këtij viti në Shtetet e Bashkuara.

Ky vendim është konsideruar një tjetër shtytje për Bidenin për të fituar pozitën në Shtëpinë e Bardhë, si dhe shenjë se demokratët po bashkohen në garën e nëntorit kundër presidentit aktual, Donald Trump.

Clinton ka njoftuar për mbështetjen e saj në një ngjarje të zhvilluar online, të organizuar nga fushata e Bidenit, për të treguar sesi pandemia me koronavirus është duke ndikuar te gratë.

Ky lajm ka ardhur edhe në kohën kur ish-nënpresidenti amerikan është duke u përballur me supozime për sulm seksual nga ish-pjesëtarja e stafit të tij në Senat, Tara Reade.

Gjatë kësaj jave dy persona kanë thënë që Reade u ka treguar atyre për ngacmimet seksuale në mesin e viteve 1990.

Vetë Biden nuk ka komentuar këto supozime, ndonëse fushata e tij ka lëshuar një kundërshtim të ashpër.

Reade, e cila pretendon se është demokrate për një kohë të gjatë, ka sulmuar Clintonin, pas mbështetjes së dhënë për Bidenin, duke thënë se është duke i dhënë mundësi një “grabitqari seksual”.

Ajo ka akuzuar edhe më parë Bidenin për ngacmime, mirëpo muajin e kaluar ka zgjeruar akuzat e saj, duke përfshirë edhe sulmet seksuale./REL