Grubi thotë se BDI është e unifikuar! Mexhiti para dy muajsh kishte vërejtje për emërimet nga BDI

Zëvendëskryeministri i parë, Artan Grubi, nuk mendon se pas 100 ditëshit të qeverisë do të pësojë ndonjë interpelancë për të nga bashkëpartiaku Izet Mexhiti, që njëherit është edhe kryetar i grupit parlamentar të Bashkimit Demokratik për Integrim.

 “Realisht ne funksionojmë si një trup i vetëm edhe BDI, edhe Grupi Parlamentar, edhe pjesa e pushtetit ekzekutiv, edhe kryetarët e komunave dhe jemi të fokusuar në realizimin e programit të BDI-së dhe nuk dëshirojmë të de fokusohemi me tema të tilla sepse kemi shumë punë për të bërë bashkërisht dhe të gjithë jemi një trup i vetëm dhe rreshtohemi pas politikave të zotit Ali Ahmeti”, theksoi Artan Grubi – zv/kryeministër i parë.

E deri sa Grubi flet për parti të unifikuar, kjo nuk u duk qartë para se ai të vinte në krye të postit që mban aktualisht. Ani pse nuk është folur hapur me emra, brenda integristëve ka pasur pakënaqësi për emërimet e bëra në eksekutiv.

 “Do votoj për këtë qeveri me vërejtjet personale që kam ndaj një pjese të ekzekutivit. Është debat i brendshëm brenda Bashkimit Demokratik për Integrim, pra jam munduar sepse në vazhdimësi të kultivohet ky debat jam munduar të jem artikulues i votuesit dhe qytetarit dhe mendoj se duhet të jenë konform dëshirës dhe vullnetit të qytetarit edhe ata që përfaqësojnë ekzekutivin mendoj që kjo do t’i ndihmojë Bashkimit Demokratik për Integrim”, u shpreh Izet Mexhiti – deputet i BDI-së.

Ditëve të fundit u përhapën zërat se pikërisht shefi i grupit parlamentar, Izet Mexhiti, do të ngre interpelancë ndaj Grubit si zëvendëskryeministër dhe Bujar Osmanit si Ministër i Jashtëm.

Mexhiti i kontaktuar nga TV21, as nuk i pohoi e as nuk i mohoi këto zëra, po vetëm tha se do të flasë pasi të kenë kaluar 100 ditët e para të qeverisë.

 “Tash as nuk e pohoj e as nuk e mohoj këtë gjë. Deri në mbarimin e 100 ditëshit të Qeverisë nuk do të prononcohem. Do të flas pas 100 ditëshit”, tha Izet Mexhiti – kryetar i Grupit Parlamentar të BDI-së.

Emër tjetër që përflitet për interpelancë nga ana e Mexhitit, është ai i Ministrit të Jashtëm Bujar Osmani. Ky i fundit madje po akuzohet nga opozita edhe për dështimin në negociatat me bullgarinë, si pasojë edhe humbjen e shansit për nisje të negociatave eurointegruese. Blloku opozitar ka kërkuar dorëheqjen e tij, Zaevit e Dimitrovit, e kjo rrit shanset që po ky bllok të mbështesë interpelancën e mundshme ndaj kryediplomatit. Osmani ndërkaq thotë se puna e opozitës është për të kërkuar dorëheqje, por po ashtu zgjat dorën për të gjetur qëndrime të përbashkëta!

“Unë mbeten i hapur për të komunikuar me opozitës, për të bashkëpunuar me ta, për të krijuar një qëndrim të përbashkët shtetëror kurse natyrisht do të vazhdojë me politikat  e tyre ditore, po ajo që do kisha kërkuar prej tyre është të mos mbajnë peng një  temë aq të rëndësishme për një interes të vogël të politikës ditore”, deklaroi Bujar Osmani – Ministër i Punëve të Jashtme.

Kujtojmë se mundësinë për interpelancë para rreth një muaji e ka përmendur edhe Blerim Bexheti, po ashtu pjesë e BDI-së.

Se çfarë do të ndodhë, mbetet për tu parë pas 10 dhjetorit 2020, atëherë kur mbushen 100 ditë nga votimi në Kuvend i përbërjes së re Qeveritare.

Interpelanca përdoret si formë kontrolli për veprimtarinë e çdo bartësi të funksionit publik. Pas kësaj pason debati në Kuvend, e nëse Kuvendi mbetet i pakënaqur nga arsyetimi i zyrtarit,  kjo mund të shërbejë si shkak për ngritjen e përgjegjësisë politike ose dorëheqjen e Qeverisë ose bartësit të funksionit publik.