Zëvendëskryeministri i parë Artan Grubi është përgjigjur në pyetjet e bashkëpartiakut të tij deputet të BDI-së, Izet Mexhiti, në fakt, vetëm njëra prej tyre ka marrë përgjigje.
Për pyetjen e parë, rreth zonës industriale në Vizbeg, Mexhiti nuk ka marrë përgjigje, për shkak se siç shkruhet në përgjigjen e Grubit,kjo “nuk është kompetencë e Ministrisë për Sistem Politik dhe Marrëdhënie ndërmjet Bashkësive”.
E paqartë mbetet se pse Grubi është përgjigjur si Ministër, e jo si zëvendëskryeministër i parë i qeverisë, që llogaritet edhe përfaqësuesi më i lartë i integristëve në Qeveri, ashtu siç ju drejtua edhe Mexhiti më 30 dhjetor.
“Disa tema që kësaj radhe kanë të bëjnë me ekzekutivin e BDI-së, pjesën e BDI-së, në krye me z.Grubi”, tha Izet Mexhiti – deputet i BDI-së.
Po për dallim nga e para, pyetja e dytë ka një përgjigje, që kanë të bëjnë me përfaqësimin e barabartë në ndërmarrjet private si dhe sistemimin e administratorëve shtëpiak.
“Pra duhet një trajtim më serioz ndaj tyre apo edhe duhet t’u pranohen fillimisht fakultetet dhe pastaj të vrapojmë ti sistemojmë”, potencoi Izet Mexhiti – deputet i BDI-së.
Në përgjigjen e Grubit për këtë çështje, shkruhet se “në programin qeveritar parashihet që Qeveria të ftojë dhe inkurajojë sektorin e biznesit, kompanitë vendore dhe të huaja që t’i përkrahin marrëdhëniet e mira ndëretnike dhe vlerat e tolerancës, përfaqësimin dhe besimin e ndërsjellë edhe në vendet e tyre të punës”, ndërkaq në lidhje me të punësuarit, Grubi përgjigjet se “të gjithë të punësuarit që i plotësojnë kushtet ligjore, u është njohur diploma për përfundim të arsimit të lartë dhe janë avancuar para se të sistemohen në institucione të tjera”.
“E treta, ne patëm disa pika në 100 ditëshin e parë të qeverisë, premtimet tona të BDI-së, nuk është mirë që asnjë nga këto premtime nuk është realizuar”, theksoi deputeti i BDI-së, Izet Mexhiti.
As për këtë Grubi nuk është përgjigjur, për shkak se siç shkruan, “në pyetjen e tretë nga deputeti, nuk vërejnë pyetje por konstatim”.
Nga data në krye të dokumentit, duket se përgjigjet janë dërguar më 19 janar, në ditën e fundit të afatit të paraparë për përgjigje me shkrim të pyetjeve të deputetëve.