Një ditë pasi përfundoi greva e punëtoreve të Higjienës Komunale, Shkupi ende është nën mbeturina. Në vende të ndryshme ku janë të vendosur kontejnerë, mbeturinat janë në sasi mbi normalen. Gjendje të tillë kemi edhe në Çair. Kryetari i kësaj komune Visar Ganiu, thotë se ka filluar grumbullimi i mbeturinave dhe pret që deri në mbrëmje gjithçka të vihet nën kontroll.
“Ne kemi pasur mundësi tek lagjet apo pjesa e Çairit të vjetër kanë qenë në teren mbrëmë edhe punëtorët duke pastruar por grumbullimi i tepërt i mbeturinave, pasi që bëhet fjalë për disa ditë, ai proces nuk ka mundur të përfundon natën e kaluar kështu që edhe sot gjatë ditës në bulevarin Xhon Kenedi kam informata se janë duke i pastruar dhe larguar mbeturinat. Unë mendoj që deri në mbrëmje ne do ta vendosim Çairin nën kontroll dhe pastaj do të fillon orari i përditshëm”, tha Visar Ganiu – kryetar i komunës së Çairit.
Mbrëmë Higjiena Komunale kishte njoftuar 27 persona se janë larguar nga puna. I pyetur nëse ky vendim ka prapavijë politike, Ganiu shpreson që mos ketë një gjë të tillë dhe e quan një akt jo të mirë.
“Unë nuk mendoj që ka ndonjë prapavijë politike, më duhet të kem informata të plota. Nuk mundem të predikoj në këtë moment. Mendoj që ato që janë larguar nga puna, nuk është një akt i mirë. Duhet të rishiqohet e gjithë situata”, dekalroi Visar Ganiu – kryetar i komunës së Çairit.
Sipas asaj që njoftoi dje e para e Shkupit Danella Arsovska, se ka patur persona që kanë vepruar në Gjermani e Zvicër, ndërsa kanë qenë të evidentuar si punëtorë në Higjienën Komunale, ministri i punëve të brendshme tha që çdo keqpërdorim i buxhetit të shtetit, do të sanksionohet.
“Nëse ka patur mospërputhje në punë, nëse ka patur dhënie të pagave për persona që kanë qenë të punësuar me marrëveshje, e nuk kanë ardhur në punë duke keqpërdorur mjete buxhetore, çdosecili për këtë punë do të bartë përgjegjësi. Këtu nuk do të ketë lëshime dhe nuk do të ketë për asnjë rast lëshim por se kjo duhet të sanksionohet që përfundimisht t’i jepet fund politikave dhe lojërave që ndodhin në kurriz të qytetarëve e këtu në fakt është në kurriz të shëndetit të qytetarëve”, pohoi Oliver Spasovski, ministër i Punëve të Brenshme.
Nga ana tjetër nuk kanë munguar akuzat politike nga partitë maqedonase LSDM dhe VMRO-DPMNE. Secila prej tyre i’a hedhin fajin njëra tjetrës për bashkëpunime dhe koalicione politike me kryetaren e Shkupit Danella Arsovska. LSDM madje sot ka kërkuar të thirret seancë e jashtëzakonshme në Qytetin e Shkupit, ku do të propozojnë që në mbledhjen e mbeturinave të angazhohen të gjitha ndërmarjet publike që funksionojnë nën menaxhim të Qytetit të Shkupit.