“Le të kthehen, nëse kanë sadopak respekt për atdhetarin e tyre e patriotin e tyre Goce Delçevin, dhe le ta shohin që me plis të bardh Goce Delçevi ka mbajtur fjalime para shqiptarëve”.
Kështu tha dje kreu i BDI-së Ali Ahmeti për figurën heroike maqedonase Goce Dellçevin.
Ai tha se kjo është një porosi për kryetarët e partive maqedonase që po bëjnë përpjekje për unitet mes tyre që vetëm e vetëm mos të jetë kryeministri shqiptarë.
Por si e komentojnë historianët këtë deklaratë të Ahmetit?
Arben Lalla thotë se kjo është një deklaratë e fushatës dhe se nuk ka të bëjë me të vërtetën.
“Është një deklaratë e fushatës, nuk besoj se ka burime historike që Dellçevi ka mbajtur plis të bardh, por zotëri Ali Ahmeti është në fushatë, është politikan dhe me deklaratat e tij josh votuesit për vota për fitore”, deklaroi Arben Lalla – historian.
Profesori Gjorgji Spasov ka reaguar në rrjetin social facebook, duke e pyetur Ahmetin se pse asnjëherë nuk ka thënë publikisht asnjë fjalë në gjuhën maqedonase.
“Dhe Ali Ahmeti, i cili na bind se të gjithë fëmijët në klasën e 5-të në Maqedoni duhet ta kenë gjuhën shqipe si lëndë të detyrueshme, në mënyrë që ta kuptojmë njëri-tjetrin më mirë, edhe pse ai ka lindur në Kërçovë dhe ka qenë pjesë e qeverisë për 16 vjet, nuk ka thënë asnjë fjalë të vetme publikisht, në gjuhën maqedonase, e lëre më të mbajë një fjalim në maqedonisht për bashkim dhe kështu të tregojë respekt elementar për bashkëqytetarët e tij”, tha Gjorgji Spasov –profesor.
Ka reaguar edhe Igor Janushev nga VMRO-DPMNE. Ai thotë se Goce Dellçev nuk ka mbajtur plis por stilolaps dhe pushkë.
“Goce Delçevi nuk mbante plis, por përveç pushkës, ai mbante një stilolaps, sepse ishte mësues. Me atë stilolaps ai ndryshoi mjedisin dhe luftoi për Maqedoninë”, tha Igor Janushev – VMRO-DPMNE.
Për figurën e Goce Dellçevit ka përplasje edhe mes historianëve bullgar dhe atyre maqedonas.Ai në vendin tonë konsiderohet si një hero kombëtar i cili ishte njëri nga themeluesit e lëvizjes kombëtare maqedonase, por edhe bullgarët e konsiderojnë si hero të tyre.