Gjyshja Persa dhe të tjerët ende të revoltuar, asnjë gur nuk është lëvizur në Vollkovë edhe pas vizitës së Zaevit

Të gjithë e pamë se si dy gjyshet sulmuan kryeministrin e atëhershëm, Zoran Zaev dhe kryetarin e Gjorçe Petrovit, Aleksandër Naumovski se pse nuk kishin kanalizim dhe asfaltim të rrugëve në shtëpitë e tyre.

Gjyshja: Tre vjet presim zotëri. 15 vjet presim. Të gjithë kemi paguar, askush s’ka fituar.
Naumovski: 30 kilometra kanë përfunduar. Ishte gabuar projekti. E dini edhe ju. Tre rrugë janë lërë komplet.
TV21: Kur do të bëhet?
Naumovski: Gjatë pranverës.
Banore: Asnjë gozhdë nuk është vendosur nga komuna. Asnjë gozhdë…
Naumovski: Ju thash se nuk mund që për dy vjet të bëjmë gjithçka.

Tetë muaj pas kësaj ngjarje, asnjë ndryshim në Vollkovë.

Gjyshja Persa e zhgënjyer nga premtimet, sot vetë po e shtron rrugën para shtëpisë së saj. Kanalizimin e ka marrë nga pjesa e poshtme duke investuar vetë në kyçjen.

“Ne nga atje e kemi lidhur. Ne dhe fqiu me paratë tona kemi bërë kyçjen. Ata e kanë rregulluar deri këtu dhe aq, e kanë ndërprerë. Nëse gënjej, ja ka dëshmitarë ka këtu dhe le të tregojnë se a është e vërtetë apo jo. Asgjë nuk kanë bërë, përveç se rrugën nga lartë janë duke e rregulluar. Tjetër asgjë. Për çka e kemi këtë shtet, pastaj po ikin të rinjtë, normal se ikin. A të qëndrojnë këtu, t’i votojmë që ata të ulen në Kuvend. ja edhe unë do të ulem në Kuvend dhe do të shtyp çdo sustë”, sot thotë gjyshja Persa.

Ndryshim nuk ka as te rruga e gjyshes tjetër.

Në rrugën tjetër, asfaltimi është bërë me vetëfinancim, por nuk ka kanalizim dhe ndriçim rrugor. Puset i pastrojnë me gypa të cilat i zgjasin nga 30 metra deri në pusetën e fundit të kanalizimit në të cilin nuk mund të kyçen asnjëra familje.

“20 vjet jam këtu, s’kemi rrymë, ndriçim rrugor. Edhe kanalizim na duhet. Kemi reaguar, kemi nënshkruar peticionin, i kemi dërguar te kryetari i mëhershëm. Dhe prej atëherë askush s’ka ardhur që të na pyesë”, thotë një banorë.

“Ne jemi rruga 43. Vjet isha te kryetari na tha se gjatë gushtit do të na rregullojë. Tha se kush nuk ka paguar, të paguajë dhe sa të marrë mjete do të fillojë. Dhe nga atëherë asgjë. Në të njëjtin vend e patë edhe vetë, incizuat. Kanë qenë këtu, e kanë parë se terreni është i vështirë edhe kompania është tërhequr dhe thonin se duhet të shpallet sërish tender”, deklaroi një banor tjetër.

Të njëjtat probleme i thotë edhe kryetari i Gjorçe Petrovit, Aleksandër Naumovski. Thotë se për të larguar pengesat, do të duhen edhe 14 mijë euro shtesë nga 700 mijë eurot sa ishin ndarë për kanalizimin e kësaj ane. Tash premton se kanalizimi do të jetë gati për vitin e ardhshëm.

“Kemi siguruar 700 mijë euro për kanalizimin e asaj pjese, kemi përzgjedhur realizuesin, por për shkak se në terren është paraqitur një hartë nëntokësore e cila është afër shtëpive, punimet kanë ngecur. Po përpiqemi që kanalizimin ta afrojmë nga pjesa tjetër, nga ku nuk ka shtëpi. Por për këtë duhen edhe 14 mijë euro shtesë. me të gjitha këto, besoj se deri në fund të vitit të ardhshëm kanalizimi do të jetë gati”, deklaroi Naumovski.

Në këtë pjesë ka edhe Shtëpi të pleqve. As ajo nuk ka kyçje në kanalizim. Banorët ankohen se mbetjet që dalin nga atje, kundërmojnë erë të keqe në tërë fshatin. Të gjithë banorët kishin paguar nga 30 mijë denarë për kanalizimin në Komunën e Gjorçe Petrovit para 10 vjetësh. Paratë nuk janë kthyer dhe kanalizimi ende askund.