Gjykimi për “Llaskarcën” vazhdon më 16 mars! Familjarët dyshojnë për përpjekje për zvarritje të gjykimit

TË FUNDIT

Në Gjykatën Penale të Shkupit sot vazhdoi seanca gjyqësore për rastin Llaskarca, ku në pyetje u mor ekspertja Jovanka Savova, e cila është pjesë e ekipit që e ka përgatitur super ekspertizën. As sot në gjykatë nuk u dëgjua ekspertiza kyçe e Zekiria Zekirit, i cili edhe sot mungoi me arsyetimin për shkaqe shëndetësore. Familjarët e viktimave hedhin dyshime për përpjekje për zvarritje të procesit gjyqësor. Thonë se po vazhdon cirku në gjykatë dhe se kjo nuk është lojë por bëhet fjalë për rast ku jetën e kanë humbur 16 persona dhe janë lënduar 30. Njëri prej avokatëve të palës së akuzuar, Sasho Dukovski, u shpreh se kur ekspertiza, në rastin konkret super-eksperiza është përgatitur nga një ekip, çdokush nga ekipi vendos se kush në cilën pyetje do të përgjigjet dhe kjo nuk mund të përcaktohet nga dëshira e ndokujt.

 “Gjithnjë kur avokatët e të akuzuarve ndjejnë se dëshmitarët e tyre, ose tani së fundmi ekspertë, nuk kanë ose nuk dinë të përgjigjen, në skenë del ndonjëri prej tyre, pas çka shkaktohet tension me qëllim që të vihet deri në ndërprerjen e procesit gjyqësor, me çka do të fitonin kohë shtesë që t’i përgatisin ekspertët, siç u pa në seancën e sotme”, tha Bllagojçe Trpevski, familjar i një viktime. 

Pse gjykata e ka kërkuar këtë super-ekspertizë? Gjykata duhet të përgjigjet. Ne duhet të merrnim diçka më të lartë sesa ishte ekspertiza e Prokurorisë dhe mbrojtjes. E patë sot sërish nuk erdhi doktor i shkencave, me arsyetimin me një farë shkrese mjekësore se është i sëmurë. Për të ka njohuri se shkon në punë dhe lëviz nëpër Shkup. Gjykata thotë se s’mund ta vërtetojnë këtë, sepse ka sjellë shkresë”, deklaroi Sinisha Ristovski, familjar i një viktime.

 “Është vendosur një praktikë që nuk ishte parë deri më tani në gjyqësor, që të plotëson lista dëshirash se cili ekspert do të përgjigjet në çdo lloj gjëje. Në lidhje me sëmundjen e pretenduar, unë nuk do të doja të kyçesha në të tilla teori konspiracioni, se e kanë parë ekspertin atje e këtu. Vlerësoj se gjykata themelore penale në Shkup, si pjesë e pushtetit të tretë, është institucion veçanërisht serioz, e që të mos besojë në dokumentacion origjinal, çfarë do me thënë kjo, që askush të mos mund të sëmuret në ditët e sotme?!”, theksoi Sasho Dukovski, avokat.