Është gjetur trupi i një ushtari indian, i cili ishte zhdukur në Himalaje 38 vjet më parë.
Chandrashekhar Harbola dhe 19 kolegë u zhdukën nga një ortek bore gjatë një operacioni patrullimi në akullnajën Siachen përgjatë kufirit Indi-Pakistan, në vitin 1984.
Pesëmbëdhjetë trupa u gjetën më vonë, por pesë mbetën të zhdukur, raportoi BBC-ja të martën.
Siachen është fusha më e lartë e betejës në botë dhe shumë nga ushtarët nga të dy vendet, vdiqën nga stuhitë dhe ortekët.
Njësia e ushtrisë që pa trupin e Harbolas gjeti gjithashtu një tjetër, por ende nuk është identifikuar, njoftoi agjencia e lajmeve PTI.
Kjo nuk është hera e parë që pas dekadash gjendet trupi i një ushtari. Një njësi patrulluese gjeti trupin e Tukaram V Patil në vitin 2014 – 21 vjet pasi ai u zhduk në akullnaja.
Siachen është një zonë e kontestuar midis Indisë dhe Pakistanit. Bisedime janë zhvilluar për çmilitarizimin e zonës, por pa asnjë sukses.
Të paktën 129 ushtarë pakistanezë vdiqën në vitin 2012 në një ortek pranë akullnajës Siachen. Incidenti nxiti thirrje për Indinë dhe Pakistanin që të tërhiqnin trupat nga zona e kontestuar, por fqinjët nuk arritën marrëveshje.
Të paktën 10 ushtarë indianë vdiqën në një ortek në vitin 2016 dhe katër të tjerë vdiqën në vitin 2019 në rrethana të ngjashme.