Fushata “pastrimi gjeneral i fundjavës”, filloi me pastrimin e Akueduktit në Shkup

Nisma “Pastrimi gjeneral i fundjavës” filloi me pastrimin e Akueduktit në Shkup. Krahas vullnetarëve të shumtë, shoqatave dhe ndërmarrjeve të ndryshme, nisma ka mbështetje edhe të zyrtarëve publikë.
Pasi simbolikisht ndihmoi në mbledhjen e mbeturinave, presidentja Gordana Siljanovska-Davkova citoi disa filozofë francezë për pikëpamjet e tyre në raportin njeri-natyrë.

“Ne në drejtësi themi se ai që është më i vjetër ka të drejta më të forta ose më të mëdha, por bimët erdhën në ekzistencë të parat, pastaj kafshët dhe pastaj njerëzit. Njerëzit sillen si ndërhyrës në parajsë, ky është një fakt. Nëse nuk bëjmë paqe me natyrën, do të kryejmë vetëvrasje”, tha presidentja e vendit, Gordana Siljanovska Davkova.

Zëvendëskryeministri dhe ministri i Mjedisit, Izet Mexhiti, tha se kjo nismë çdo vit po bëhet më e madhe.

“Mjedisi dhe veçanërisht monumentet e këtilla kulturore si “Akuedukti” meritojnë respekt dhe kujdes. Veprime të këtilla me të cilët të gjithë së bashku tregojmë iniciativë, vullnet dhe gatishmëri për bashkëpunim duhet të jenë pjesë e jetës sonë të përditshme”, deklaroi Izet Mexhiti – zëvendëskryeministër dhe ministër i Mjedisit dhe Planifikimit Hapësinor.

Ambasadori i Austrisë Martin Palmer shprehet i kënaqur që ky aksion po zhvillohet vite me radhë.

“Mendoj se duhet të jemi të vetëdijshëm se kjo është e rëndësishme jo vetëm për ju, por edhe për ne si njerëz që jetojmë këtu. Është e rëndësishme si për imazhin e vendit ashtu edhe për turizmin”, potencoi ambasadori i Austrisë, Martin Palmer.

Ministrja e Arsimit Vesna Janevska tha se sistemi arsimor, përmes temave dhe përmbajtjeve, i mëson të rinjtë të kujdesen për mjedisin.

“Të gjithë kemi përgjegjësi të krijojmë breza të edukuar për mjedisin, gjë që do të zvogëlojë sfidat me të cilat do të përballen në të ardhmen”, theksoi Vesna Janevska – ministre e Arsimit dhe Shkencës.

Kryetari i BNJVL-së Orce Gjeorgjievski theksoi se aktivitetet do të vazhdojnë edhe në të ardhmen.

“Shpresoj që si deri më tani aktivitetet e tyre edhe në perspektivë do të vazhdojnë duke i motivuar të gjithë të vazhdojnë në këtë proces”, u shpreh Orce Gjeorgjievski – kryetar i BNJVL-së.

Kryetari i Çairit Visar Ganiu, tha se ky aksion që po zhvillohet në një moment të rëndësishëm, përbën thirrje të qartë në ruajtjen e trashëgimisë historike.

“Pjesëmarrja e qindra vullnetarëve nga komuna të ndryshme të vendit dëshmon se fryma, solidariteti dhe ndërgjegjësimi i qytetarëve është gjallë dhe aktiv”, deklaroi Visar Ganiu – kryetar i Komunës së Çairit.

Ky eko-aksion u mbështet edhe nga Kryqi i Kuq dhe Qendra Vullnetare Shkup.