Vetëm disa njerëz sot kanë pothuajse pushtet të pakufizuar mbi zhvillimin e inteligjencës artificiale, paralajmëroi Komisioneri i Lartë i Kombeve të Bashkuara për të Drejtat e Njeriut, Volker Turk.
Duke folur në hapjen e sesionit të 63-të të Këshillit të OKB-së për të Drejtat e Njeriut në Gjenevë, Turk vlerësoi se zhvillimi i shpejtë i inteligjencës artificiale ngre çështje serioze lidhur me të drejtat e njeriut, privatësinë dhe kontrollin mbi teknologjinë.
“Disa burra kanë pothuajse pushtet të pakufizuar mbi inteligjencën artificiale”, tha Turk, duke paralajmëruar se kompanitë e mëdha teknologjike kanë ndikim të jashtëzakonshëm mbi sistemet që po ndikojnë gjithnjë e më shumë në jetën e përditshme.
Sipas tij, vonesa në vendosjen e rregullave dhe mekanizmave të qartë të kontrollit u shërben më së shumti kompanive të mëdha teknologjike, pronarëve të tyre dhe njerëzve që qëndrojnë pas tyre.
Turk paralajmëroi gjithashtu se sistemet e avancuara të inteligjencës artificiale mund të përbëjnë një rrezik serioz, madje edhe ekzistencial për njerëzimin, nëse zhvillimi i tyre vazhdon pa mekanizma të mjaftueshëm sigurie.
Ai u bëri thirrje shteteve që të bien dakord për “vija të kuqe” të qarta lidhur me përdorimin dhe zhvillimin e inteligjencës artificiale, si dhe për garanci të forta për sigurinë e saj.
Komisioneri i Lartë njoftoi se do t’u drejtohet drejtpërdrejt edhe kompanive që zhvillojnë inteligjencën artificiale dhe do t’u kërkojë të ndërmarrin menjëherë hapa për të zvogëluar rreziqet.
Sipas Turk, çështja e inteligjencës artificiale nuk është më vetëm një çështje teknologjike. Bëhet fjalë edhe për atë se kush e kontrollon teknologjinë, kush ka në dispozicion të dhënat e qytetarëve dhe kush do të përcaktojë rregullat sipas të cilave ajo do të funksionojë në të ardhmen.