Franca dhe Gjermania me “zgjidhje kreative” për zhbllokim të rrugës eurointegruese të Maqedonisë? Rokas: Ka shumë aktivitete diplomatike, çdo ndihmë është e mirëseardhur

I pyetur nëse ka informacione që Franca dhe Gjermania po punojnë për zgjidhje kreative në lidhje me zhbllokimin e rrugës eurtointegruese të Maqedonisë së Veriut, euroambasadori në Shkup, Mihalis Rokas tha se ka shumë aktivitetet diplomatike për këtë çështje për momentin, shkruan TV21. Rokas tha se çdo ndihmë shtesë e diplomacisë, është e e mirëseardhur.

“Ka shumë aktivitete diplomatike në këtë moment rreth kësaj çështje. Siç e dini kryeministri ishte në Bruksel, për t’u takuar me udhëheqsinë e re të BE-së. Është Samiti për Ballkanin Perëndimor javën tjetër, më datë 18. Do të ketë një tjetër vizitë në Bruksel. Mendoj se BE-ja e ka bërë të qartë se zgjerimi është prioritet, kjo nënkupton përfshi Maqedoninë e Veriut. Në këtë moment, udhëheqësia e re po bën përpjekje për t’ia lehtësuar vendit dhe ne si Delegacion i BE-së këtu, për t’i ndihmuar vendit të zbatojë të gjitha reformat e nevojshme për të ardhur në këtë fund, për të ecur shpejt dhe për të kapur këtë mundësi. Kështu që, do të thosha çdo mbështetje ose përpjekje e shtuar diplomatike për të vazhduar tutje sa më shpejtë që është e mundur, është shumë e mirëseardhur”, tha Rokas./tv21.tv