Filloi formimi i Frontit Europian. Bashkimi Demokratik për Integrim dhe Lëvizja Populli, janë dy partitë e para që do të jenë pjesë e këtij fronti, i cili do të garojë si një bllok i vetëm në zgjedhjet parlamentare të 8 majit. Kreu i BDI-së Ali Ahmeti, thotë se ky unifikim i partive politike shqiptare është i nevojshëm përshkak kanosjeve që i vijnë vendit tonë por edhe më larg. Sipas Ahmetit, partitë tjera, duke aluduar për partitë nga fronti opozitar, nuk kanë kapacitet të përballen me sfida të tilla.
“Pse në vitin 2024 duhej ndërtuar ky front. Pse unë dhe Skender Rexhepi duhet të vendosim mbi atë parcialen, të përgjithshmen. Sepse është kohë që e kërkojnë pikërisht tani këtë unifikim, këtë bashkim të shqiptarëve në RMV. Ne asgjë nuk kemi kundër partive politike, rrofshin e qofshin por nuk kanë kapacitete të përballen me gjitha këto zhvillime tek ne, rreth nesh dhe më larg se ne”, tha Ali Ahmeti – Kryetar i BDI-së.
Për Skender Rexhepin nga Lëvizja Populli, ky front do të jetë sihariq i mirë për gjithë shqiptarët në Republikën e Maqedonisë së Veriut. Ky front sipas tij, do të jetë bartës i ndryshimeve dhe përmirësimit të standardeve jetësore.
“Sot, për ne e llogarisim se është një ditë historike. Sot hapet një kapitull i ri, një kapitull i quajtur Fronti Europian i cili do mbahet mend gjatë kohë në historinë tonë sepse po ky front europian do të jetë bartës i ndryshimeve, i përmirësimit të jetës dhe standardeve tona jetësore. Ky Front Europian do të jetë një sihariq i mirë sepse megjithatë ne, shoqëria jonë në përgjithësi pa dallime etnike do të jetë në një rrugëtim të mirë”, theksoi Skender Rexhepi – Lëvizja Populli.
Por a do të zgjerohet Fronti Europian me parti të tjera përfshirë edhe me Aleancën për Shqiptarët, me në krye Ziadin Selën. Ahmeti thotë se tanimë një kohë të gjatë kanë filluar bisedimet për bashkëpunim edhe me partitë e tjera.
“Ka kohë që jemi duke biseduar edhe me partitë e tjera. Jemi duke biseduar me të gjithë. Edhe me Aleancën edhe me z.Thaçin edhe me z.Arianit Hoxha edhe me partitë turke, partitë boshnjake, rome, që t’i bashkangjiten këtij fronti”, pohoi Ali Ahmeti – BDI.
Përndryshe nga Aleanca për Shqiptarët deri tani në asnjë moment nuk kanë pohuar se po zhvillojnë bisedime me BDI-në për koalicionim dhe qëndrimi i tyre ka qenë se do të garojnë vet në zgjedhje. Për Arben Taravarin, shkuarja në lista të përbashkëta mes BDI-së dhe ASH-së, siç tha, është diçka që nuk mund ta imagjinojë.