Filipçe: S’kanë qëllim që të vazhdojnë drejtë BE-së! Mickoski: Nuk jemi optimist të mëdhenj, nuk kemi garanci

Qeveria nuk tregon se ka për qëllim që të vazhdojë rrugën eurointegruese, akuzoi kryetari i LSDM-së, Venko Filipçe. Ai vlerësoi se nuk është ndërmarrë asnjë hap për premtimet e VMRO-DPMNE-së që të ndërtohet një pozitë më e mirë e shtetit me çka do të zhbllokohet rruga eurointegruese.

“Ky është obligim i qeverisë. Të bëjnë gjithçka, ja, sipas premtimeve të tyre se do ta përmirësojnë pozitën dhe se do të bëjnë nuk di çfarë…ne shohim vetëm se përkeqësohen marrëdhëniet tona me Bullgari dhe kjo nuk shkon në favor të interesave kombëtare të vendit”, tha Venko Filipçe – kryetar i LSDM-së.

Nga ana tjetër, kryeministri Mickoski zgjidhjen e sheh përmes ndryshimeve kushtetuese me prapaveprim, por siç shtoi, nëse pranohet ideja e këtillë, megjithatë do të duhet të kemi garanci se nuk do të ketë kushte shtesë në rrugën drejt BE-së.

“Atë që mund ta shoh për momentin por edhe atë që po e dëgjoj është se askush nuk mund të na garantojë asgjë. Për shkak të asaj, ne nuk mund të jemi shumë optimistë siç do të donim të ishim, andaj këto dy procese-drejt anëtarësisë së plotfuqishme në BE dhe realizimit të detyrës shtëpie, do t’i udhëheqim paralelisht”, u shpreh kryeministri Hristijan Mickoski.

Megjithatë, Mickoski shtoi se fokusi më i madh do të jetë në reformat e vendit.

“Nëse paraqitet një rrugë me dy drejtime në anën tjetër, ne jemi këtu, të gatshëm për të biseduar”, shtoi Hristijan Mickoski – kryeministër i Maqedonisë së Veriut.

Mickoski paraprakisht paralajmëroi se do të presë që të formohet qeveri e qëndrueshme politike në Sofje me të cilën do të fillojnë negociatat për zhbllokim, ndërsa nga Bullgaria u përgjigjën se rinegociim për atë që tashmë është dakorduar nuk do të ketë me cilëndo qeveri bullgare.