Para Komisionit Anketues në Kuvend për skandalin në Klinikën e Onkologjisë, dëshmoi ish ministri i shëndetësisë, Venko Filipçe. Para deputetëve Filipçe u shpreh se gjatë menaxhimit të tij me ministrinë, nuk ka pasur lëshime në punën e Klinikës së Onkologjisë. Sa i përket mënyrë së dhënies së terapisë, thotë se nuk ka pasur njohuri. Lidhur me ish drejtorin e Onkologjisë Nino Vasev, tha vetëm që është një mjek profesionist por nëse ka dyshime për keqpërdorime, pret të hetohet. Për ish drejtorin Nehat Nuhi vetëm përmendi se shumë pak ka arritur të bashkëpunojë me të. Edhe për sistemin KATO që nuk është vënë në funksion fare në Onkologji, thotë se nuk ka pasur njohuri. Lidhur me furnizimin e ilaçeve me revers, arsyetohet se kanë qenë të detyruar sepse ato ilaçe kanë qenë të nevojshme urgjentisht për disa pacientë. Seanca vijoi me shumë përplasje mes opozitës dhe pozitës. Përpos Filipçes, dëshmi gjatë ditës ka dhënë edhe ministri aktual i shëndetësisë, Fatmir Mexhiti.