Festë pa maska e integristëve! Zyrat e institucionit publik shfrytëzohen për ditëlindje

15 persona, pa maska, në një hapësirë të mbyllur. Të gjithë zyrtarë nga radhët e Bashkimit Demokratik për Integrim.

Kështu u përuruan hapësirat e reja të Ministrisë për Sistem Politik, e cila përkoi edhe me ditëlindjen e kreut integrist Ali Ahmeti. Vetë partia u kujdes për të informuar se “Në ditëlindjen e Ali Ahmetit – Artan Grubi promovon objektin e ministrisë”.

Torta nuk mungoi. Pra, përveç se pa maska, u shfrytëzuan zyrat e një institucionit publik për ditëlindje. Po zyrtarët e BDI-së, nuk e interpretojnë kështu.

Bujar Osmani: “Nuk ka pasur festim të ditëlindjes”.

-Torta me….?

Bujar Osmani: “Jo, jo, ka qenë një befasi nga një i punësuar që nuk mund ta parashohë askush”.

Si ministri Osmani, poashtu edhe zëvenskryeministri i parë Artan Grubi, thonë se festë nuk ka pasur, protokollet janë respektuar dhe nuk ka pasur shkelje të ligjit.

 “Protokollet janë respektuar brenda, ka qenë çështje e momentit që nuk ka zgjatur më shumë se 10 sekonda dhe në këtë drejtim mendoj se ka qenë gjithçka në rregull sepse ju nuk mund të parashikoni se kur dikush mund të bëjë një befasi të tillë, ashtu që këtu mendoj se duhet bërë dallim, mes dhënies së mesazhit që mendoj se është gabim dhe mosrespektimit të ligjit që mendoj se nuk ka pasur mosrespektim”, deklaroi Bujar Osmani – Ministër i Punëve të Jashtme.

 “Fotografia e publikuar nga Ministri i Punëve të Jashtme, z. Bujar Osmani ishte vetëm një çast për realizim të një fotografie të përbashkët gjatë një befasie të vogël të bërë nga një koleg i yni për kryetarin z. Ali Ahmeti, njëjtë sikur edhe ajo që iu bë vitin e kaluar në Kuvend, duke shfrytëzuar prezencën e tij”, tha Artan Grubi – zëvendëskryeministër i parë.

Megjithatë këto veprime mund të mos mbeten me kaq. Kryetarja e Këshillit Inspektues zotohet se rasti do të shqyrtohet.

 “Të gjitha inspektoratet veprojnë në mënyrë joselektive, kështu do të jetë edhe në këtë rast konkret, do me thënë inspektorati kompetent do t’i kontrollojë pretendimet, nëse ka ndonjë shkelje të protokolleve dhe do të njoftoheni në kohë për konstatimet”, theksoi Magdalena F. Grashkoska – Kryetare e Këshillit Inspektues.

Me vendim të qeverisë, mbajtja e maskës është e detyrueshme, si në hapësira të mbyllura e po ashtu edhe të hapura dhe nuk precizohet ndokund se e njëjta mund të hiqet për pak sekonda, sa për t’u fotografuar.