UEFA ka bërë të ditur se ka nisur hetim për ngjarjet që ndodhën në tribuna pas ndeshjes Kroaci-Shqipëri.
Mësohet se pjesë e hetimit është bërë festa e Mirlind Dakut në fund të ndeshjes.
“Në përputhje me nenin 31(4) të Rregullores disiplinore të UEFA-s, një Inspektor i Etikës dhe Disiplinës i UEFA-s është caktuar sot për të kryer një hetim në lidhje me sjelljen e mundshme raciste dhe/ose diskriminuese nga mbështetësit që dyshohet se kanë ndodhur në kuadër të Kampionatit Europian 2024 në ndeshjen e fazës së grupeve ndërmjet ekipeve përfaqësuese të Federatës Kroate të Futbollit (HNS) dhe Federatës Shqiptare të Futbollit (FSHF), e luajtur më 19 qershor 2024 në Hamburg të Gjermanisë.
Informacione të mëtejshme në lidhje me këtë çështje do të vihen në dispozicion në kohën e duhur.
Në lidhje me ndeshjen e fazës së grupeve të Kampionatit Europian 2024 ndërmjet ekipeve përfaqësuese të Federatës Kroate të Futbollit dhe Federatës Shqiptare të Futbollit të luajtur më 19 qershor 2024 në Hamburg të Gjermanisë, është hapur një hetim në lidhje me sjelljen e supozuar të papërshtatshme të lojtarit të Federatës Shqiptare të Futbollit (FSHF), z. Mirlind Daku.
Informacione të mëtejshme në lidhje me këtë çështje do të vihen në dispozicion në kohën e duhur”, njoftojnë nga UEFA.
Ndërkaq, i menjëhershëm ka qenë reagimi i Mirlind Daku, i cili me anë të një postimi në profilin e tij zyrtar në Facebook ka kërkuar ndjesë për episodin e ndodhur në fund të sfidës me Kroacinë.