Federata Angleze e futbollit ngre akuzë ndaj CR7 për dhunë ndaj tifozit autik

TË FUNDIT

Federata Angleze e Futbollit (FA) e akuzon Cristiano Ronaldon për sjellje të dhunshme. Referenca është e qartë: incidenti që daton më 9 prill në ndeshjen midis Evertonit dhe Manchester United.

CR7, në fund të ndeshjes së humbur 1-0, i ka thyer smartfonin një tifozi që po e filmonte teksa pesë herë fituesi i “Topit të Artë” po kthehej furishëm në dhomat e zhveshjes. Nëna e tifozit kishte denoncuar atë që ndodhi me portugezin që i kërkoi falje dhe e ftoi tifozin autik në “Old Trafford” për të parë një ndeshje.

Federata Angleze e Futbollit lëshoi ​​deklaratën e mëposhtme për incidentin në “Goodison Park”: “Cristiano Ronaldo u akuzua për shkeljen e Rregullit E3 të FA për një incident pas ndeshjes së Premier League të Manchester United kundër Everton FC, të shtunën e 9 prillit 2022. Supozohet se sjellja e sulmuesit, pas fishkëllimës së fundit të gjyqtarit, ishte e pahijshme dhe/ose e dhunshme”.

Nuk vonoi edhe përgjigja e “Djajve të Kuq”: “E lexuam njoftimin e FA në lidhje me Cristiano Ronaldon. Ne do ta mbështesim lojtarin në përgjigje të akuzës. Cristiano aktualisht është larguar me Portugalinë në përgatitje për ndeshjet e ‘Nations League’ kundër Republikës Çeke (e shtunë) dhe Spanjës (të martën).

Ndeshja e radhës e skuadrës sonë në Premier League është derbi i Manchesterit, i cili do të zhvillohet në stadiumin ‘Etihad’ të dielën më 2 tetor”.

Vetë CR7 kërkoi ndjesë pas incidentit: “Nuk është kurrë e lehtë të përballesh me emocionet në momente të vështira siç është ai me të cilin po përballemi. Gjithsesi, duhet të jemi gjithmonë të respektueshëm, të durueshëm dhe të japim shembull për të gjithë të rinjtë që e duan lojën e bukur. Unë do të doja të kërkoja falje për shpërthimin tim dhe, nëse është e mundur, do të doja ta ftoja tifozin që të shikojë një ndeshje në ‘Old Trafford’, si shenjë e lojës së ndershme dhe sportive”.

Pavarësisht kësaj, policia e Merseyside vendosi të hapë një hetim në lidhje me ngjarjen: “Mund të konfirmojmë se po kryejmë një hetim në lidhje me incidentin ku u përfshi një futbollist në momentin që po dilte nga fusha. Të gjitha palët e përfshira do të tregojnë versionin e tyre”.

error: Content is protected !!