Ende pritet qëndrimi zyrtar nga LSDM dhe BDI për ndryshimet e Ligjit për Vetëqeverisje lokale që i propozon koalicioni VLEN. Me to parashihet të ketë u.d. kryetar komune që do të zgjidhej në këshillin komunal deri në zgjedhjet e ardhshme lokale, sepse në të kundërtën në Gostivar, Saraj dhe Aerodrom, së shpejti do të duhet të votohet për kryetar të ri. Shumica parlamentare i ka 78 vota, ndërsa për këtë ligj, përveç shumicës së 2/3, duhet edhe Badenter. Vendimi përfundimtar tani varet nga LSDM dhe BDI. Sipas kandidatit për kryetar të LSDM-së, Jovan Despotovski këto ndryshime duhet të ndodhin sepse, siç tha, të njëjtat janë të arsyeshme në aspekt ekonomik dhe nuk do të ketë ndryshime në kartën politike nëse tani mbahen zgjedhje lokale në këto tre komuna.
“Nuk ka logjikë që të kemi zgjedhje tani dhe prapë të kemi zgjedhje për një vit. Ndoshta është e njëjta logjikë se pse pranuam, nuk jam i sigurt nëse kjo është e mençur në aspekt politik, që zgjedhjet presidenciale dhe parlamentare të mbahen në të njëjtën datë. E njëjta logjikë është edhe këtu. Nëse nuk ka pasur logjikë që brenda tre muajve të mbahen dy procese zgjedhore, atëherë nuk ka racionalizëm ekonomik që të organizohet dy herë një proces zgjedhor për të njëjtën pozitë për 15 muaj”, tha Jovan Despotovski – kandidat për kryetar të LSDM-së.
Ilire Dauti, nënkryetare e ASH, krahu i Ziadin Selës, në emisionin e djeshëm Daily Click tha se këto ndryshime po bëhen për një njeri – Arben Taravarin, andaj, siç tha, nuk sheh asnjë arsye që Aleanca të mundësojë shumicë prej 2/3 për ligjin për vetëqeverisje lokale.
Mandatari Mickoski paraprakisht i thirri të gjithë deputetët që në mënyrë të pakushtëzuar të votojnë për ndryshimet duke paralajmëruar se do të kërkojë, siç tha, një zgjidhje elegante pas zgjedhjes së qeverisë së re. Ndryshimet u aktualizuan pasi u bë e qartë se kryetari i Gostivarit Arben Taravari do të jetë ministër i shëndetësisë, se Timço Mucunski nga komuna e Aerodromit do të kalojë në Ministrinë e Punëve të Jashtme dhe Tregtisë së Jashtme, ndërsa kreu u Sarajit, Blerim Bexheti nga BDI, karrierën do ta vazhdojë si deputet.