Evakuimi i shtetasve tanë nga Afganistani! Maqedonisë i kërkohet strehimi i rreth 380 refugjatëve afganë

Tre grupe me gjithsej 61 shtetas të Maqedonisë së Veriut tashmë janë evakuuar nga Afganistani. Disa janë në Dubai e disa në Katar, të sigurt dhe rrugës për në Shkup, pohoi Ministri për Punë të jashtme Bujar Osmani, duke shtuar se edhe 14 qytetarë janë ende në Afganistan.

 “14 kanë mbetur, prej të cilëve 11 gjatë ditës transferohen në aeroport dhe do të evakuohen nga Afganistani ndërsa 3, me kërkesë të tyre, mbeten atje për t’i kryer detyrat e tyre dhe do të evakuohen të fundit bashkë me ushtrinë nga baza që është ngjitur me aeroplanin. Të gjithë të tjerët ose janë në Abu Dabi ose në Doha rrugës për në Shkup”, tha Bujar Osmani – Ministër i Punëve të Jashtme.

E përveç shtetasve të Maqedonisë së Veriut që do të arrijnë në vendlindje, vendi do të mirëpresë edhe  refugjatët afganë, kryesisht gra dhe fëmijë.

Qeveria dje njoftoi se po punohet për marrjen e gjashtë grave dhe fëmijëve, të punësuar ose anëtarë të familjeve të të punësuarve nga misioni i Kombeve të Bashkuara në Afganistan, si dhe të 180 qytetarëve, gra, fëmijë të punësuar ose anëtarë të familjeve të organizatave humanitare, organizata të drejtave të njeriut, gazetarëve ose lloj tjetër i shoqatave.

E krahas kësaj, Ministri Osmani sot tregoi se ka arritur edhe një listë shtesë me 200 emra nga Instituti Nacional Demokratik, e cila po përpunohet.

 “Unë mund të them se ka kërkesë nga Instituti Nacional Demokratik për 200 civilë, para së gjithash gra dhe fëmijë të aktivistëve të punësuar në Institutin Nacional Demokratik në Afganistan dhe këto janë lista që po trajtohen nga organet kompetente, Ministria e Jashtme, Ministria e Brendshme dhe në përputhje me këtë do të kthehet përgjigje”, shtoi Osmani.

Duke qenë se numri i fluturimeve nga Afganistani është i kufizuar, ministria tha se nuk dihet saktë se kur civilët afganë do të arrijnë në Maqedoni. Por kurdo që kjo të ndodhë, tha se ata do të trajtohen sipas rregullave të vendit dhe do të vendosen në kapacitete të ndryshme, listën e të cilave tashmë po e përpilon Trupi kooridinativ i Qeverisë.