Eurostandard, kreditë duhet të kthehen! Kompanitë do të marrin dëmshpërblim vetëm nëse mbeten para nga falimentimi

Qytetarët në mënyrë definitive do të duhet të kthejnë kreditë e marra përmes Bankës Eurostandard edhe pse duhet të vërtetohet mënyra e realizimit. Procesi dhe mënyra e kthimit, sipas ekspertëve ekonomik do të rregullohet dhe përcaktohet nga udhëheqësi i falimentimit. Sipas ish këshilltarit të Ministrisë së financave, Branimir Jovanoviq, edhe pse banka tani do të ketë drejtues të falimentimit, ajo nuk do të shkojë në likuidim dhe nuk ndalon së funksionuari, por do të vazhdojë si person juridik.

“Udhëheqësi i falimentimit do të duhet të bëjë ose riorganizim të bankës, ose shitje ose likuidim. Por ai do të vazhdojë të udhëheq bankën dhe me atë udhëheqje të tij të bankës, ai duhet të gjej mënyrë për kthimin e kredive. Një mundësi është të nënshkruaj kontratë me ndonjë bankë ose me më shumë banka, që ata tu japin kredi personave që kanë kredi në Bankën Eurostandard dhe më pas qytetarët kreditë t’i kthejnë përmes bankave tjera” thotë ish-këshilltari në Ministrinë e Financave Branimir Jovanoviq.

Sa i përket personave fizik që kanë depozite, përkatësisht mjete në Bankën Eurostandard, Jovanoviq thotë se ata që kanë depozitë deri në 30 mijë euro, do të marrin dëmshpërblim të plotë nga Fondi për sigurimin e depozitave.

“Fondi tha se do të fillojë me atë për përafërsisht dy – tre javë dhe qytetarët nuk duhet të bëjnë asgjë në këtë moment në lidhje me këtë. Fondi do të marr të gjithë të dhënat dhe do t’i njoftojë qytetarët si do të zhvillohet procesi i pagesës. Ata persona fizik që kanë mbi 30 mijë euro, do të marrin dëmshpërblim prej 30 mijë eurove, ndërsa paratë që janë mbi 30mijë euro, ndoshta do tu kthehen nëse mbeten para nga masa e falimentimit. Është shumë e rëndësishme që personat juridik – kompanitë, që kanë llogari apo mjete në këtë bankë, nuk do të marrin dëmshpërblim nga Fondi për sigurimin e depozitave as deri në 30 mijë euro, por do të marrin dëmshpërblim vetëm nëse mbeten para nga masa e falimentimit” përfundon  Jovanoviq.

Drejtori i Fondit për sigurimin e depozitave, Borçe Haxhiev, deklaroi se deri më 10 korrikun, në Bankën Eurostandard qytetarët kanë pasur depozite në lartësi prej 4.4 miliardë denarëve. Siç pohon ai, 99.4% do të marrin dëmshpërblim.

Mbi dy mijë kompani mbeten pa qasje në llogaritë e tyre për shkak të mbylljes së Bankës Eurostandard, ndërsa rreth 800milion denarë është vlera e depozitave që personat juridik, përkatësisht, kompanitë i kanë lënë në këtë bankë. Përndryshe, ish guvernatori i Bankës Popullore, Petar Goshev, gjatë mandatit të tij i mbylli Rado Bankë në vitin 2005 dhe Bankën e Maqedonisë në vitin 2007./TV21