“Europa – po, Europa – tani”/ Mbahet forumi i tretë ekonomik financiar në Shkup

Bashkëpunoni dhe kapni momentin për në BE. Ky ishte mesazhi për politikbërësit në Maqedoni, që e përcolli eurokomesari Johannes Hahn në forumin e sotëm ekonomik në Shkup. Ai thotë se partitë politike duhet t’i lënë anash interesat partiake dhe të orientohen drejt rrugës europiane të vendit. Ai beson se Maqedonia e Veriut ka gjasa të bëhet anëtarja e 28 e Bashkimit Europian.

“Mendoj se është e rëndësishme që forcat kryesore politike të punojnë së bashku në këtë synim final të Maqedonisë së Veriut. Kjo është diçka që duhet t’i lini anash interesat politike partiake. Këtë mund ta bëni në çështje tjera. Por kjo është çështje nacionale, çështje kryesore ku duhet t’i vendosni të gjitha angazhimet tuaja, të gjitha forcat në Kuvend me qëllim që të arrini synimet tuaja.”- deklaroi Johannes Hahn – Eurokomesar.

Për përfitimet që do t’i kishte Maqedonia e Veriut pas integrimit në Bashkimin Europian, foli kryeministri Dimitar Kovaçevski. Sipas tij, Maqedonia do të përfitonte shumë në ekonomi dhe tregëti.

“Anëtarësimi në Bashkimin Europian ka përfitime dhe ndikime të rëndësishme në rritjen ekonomike dhe tregëtinë. Pjesmarja në Unionin doganor të Bashkimit Europian, uljen e barierave tregtare dhe rritja e konkurencës. Anëtarësimi do të thotë dhe ndihmë finansiare për uljen e dallimeve ekonomike në vendet anëtare. Me këto mjete finansohen projekte infrastrukturore, zhvillim rajonal dhe iniciativa të ndryshme dhe stimulim të rritjes ekonomike.”- tha Dimitar Kovaçevski – Kryeministër.

Shteti do të përfitonte edhe tek IPA fondet tha ministri i Financave, Fatmir Besimi.

“Vetëm fondet e kohezionit krahasuar me fondet IPA, janë 22 herë më të mëdhaja për vendet pranuese. Por në përgjithësi, e kemi komisionerin këtu, buxheti i Bashkimit Europian për pesë vitet e ardhshme është më tepër se 11 herë më i lartë se sa ajo që e kemi si vend kandidat për IPA fondet. “- tha Fatmir Besimi – Ministër i Financave.

Në panelet tjera të forumit morën pjesë si dhe patën fjalimet e tyre edhe zv.kryeministrat e Qeverisë, Bojan Mariçiq, Fatmir Bytyqi e Sllavica Grkovska.