Pushteti të mos shpejtojë me premtimet parazgjedhore për shpërbërjen e Këshillit Gjyqësor dhe Këshillit të Prokurorëve, porosisin një pjesë e ekspertëve të fushës. Sipas profesorit Vllado Kambovski, një propozim i tillë nuk është në pajtim me rekomandimet e të ashtuquajturit Misioni vlerësues i ekspertëve europian që jep propozime si të përmirësohet puna e Këshillit gjyqësor.
“Kjo çështje është mjaftë komplekse – shkarkimi i plotë i Këshillit Gjyqësor, për shkak se nuk është e thjeshtë … për shkak se nëse e shkarkoni Këshillin Gjyqësor me ligj, pyetja kryesore është se a mundet trupa të tillë kushtetues të shkarkohen me ligje të thjeshta”, tha Vllado Kambovski – profesor universitar.
Nga grupi Bluprint për reforma në gjyqësor bënë thirrje që partitë politike dhe pushteti ekzekutiv të mos japin zgjidhje me të cilat mund të fundoset pavarësia e trupave të gjyqësorit siç është rasti me paralajmërimin për shkarkimin e gjithë përbërjes së Këshillit gjyqësor.
“Çfarëdolloj hapash në lidhje me këtë do të paraqisnin precedent i rrezikshëm, sepse çdo herë kur do të ndryshohej pushteti mund të ndryshoheshin edhe ligjet me çka rrezikohet pavarësia dhe paanshmëria e organeve gjyqësore”, u shpreh Aleksandra Cvetanovska – Bluprint, grupi për reforma.
“Është e qartë se situata nuk është siç duhet në këto këshilla. A janë ato vendime të mira duhet të rimendohet dhe të bisedohet me ekspertët juridikë dhe të miratohen përfundime të mençura”, potencoi Aleksandar Tumanovski – avokat.
Fati i Këshillit Gjyqësor ishte arsye për përplasje verbale mes ish ministrit të drejtësisë Krenar Lloga dhe kryeministrit aktual Hristijan Mickoski. Mickoski tha se këtë premtim nga programi zgjedhor i VMRO-DPMNE-së ka për qëllim që ta realizojë sepse është pjesë e luftës kundër krimit dhe korrupsionit dhe se do të rezultojë me rritjen e besimit në gjyqësor. Lloga propozoi një ligj të ri për këshillin gjyqësor. Në të janë të inkorporuar rekomandimet e ekspertëve të cilët BE i dërgoi në vendin tonë. Me to propozohet që anëtarët e këshillit të zgjidhen në Kuvend njëjtë si edhe anëtarët e Komisionit antikorrupsion. Po ashtu në të ardhmen anëtarët e Këshillit do të ishin propozim nga Oda e avokatëve dhe profesorëve të Fakultetit juridik, ndërsa ndërrohen edhe përcaktimet për përvojën e nevojshme në profesion.