Edhe këtë vit nuk u bë hapja e Teatrit shqiptar, ndërsa salla universale do të rinovohet vitin e ardhshëm

Shtatë vite më parë filloi renovimi, por ende nuk është në funksion Teatri shqiptar. Ministrja e kulturës Irena Stefoska pa përmendur data tha se tetari do të hapet zyrtarisht në pranverë. Ndryshe tetari shqiptar ka shlyer një pjesë të borxheve. Ky institucion kulturor ka nisur të rikonstruohet që në vitin 2014, ndërsa para disa javëve ka marrë miratimin e Ministrisë së Transportit për të rifilluar me punë.

“Po ishte e paraparë hapja e teatrit deri në Vtin e Ri, por drejtori dhe të punësuarit thanë se duhet të përfundojnë disa gjëra. Nëse jemi shëndosh në pranverë do të hapet zyrtarisht”, deklaroi Irena Stefoska, ministrja e Kulturës.

Rinovimi i Teatrit Shqiptar filloi në vitin 2014. Deri më tani janë shpenzuar 10.5 milion euro. Disa herë ishin shkelur afatet për përfundimin e punimeve dhe fillimin me punë të teatrit. Por edhe pasi përfunduan punimet, reshjet e shiut zbuluan se puna nuk është bërë si duhet, pasi çatia pikonte gjithandej.

Nga ana tjetër ministrja e kulturës paralajmëroi rinovimin e Sallës universale, por nuk potencoi saktë kur do të jetë gati.

“Fondet janë siguruar, të parashikuara për vitin e ardhshëm, për rinovimin e sallës sonë universale në qendrën e qytetit, për të cilën të gjithë nga kjo gjeneratë kemi kujtime”, tha Stefoska.

Salla Universale është mbyllur gati 6 vjet, gjegjësisht nga 10 marsi i vitit 2015. Ndërsa sot pikërisht në dritaret e Sallës universale performuan punonjëse seksuale, për të shënuar ditën “Stop dhunës kundër punonjësve seksual”.