Edhe administrata e “8 Shtatorit” kërkon shpërblime! Drejtori thotë se do t’i shpërblejë, por jo njëjtë si mjekët dhe infermierët

“Edhe ne jemi shëndetësi”.

“Shpërblime për të gjithë, barabartë!”

“…dhe vendime!”

“…vendime me ata me kontrata”

Me këto thirrje e parulla u protestua përballë spitalit “8 shtatori” në Shkup, ndër kovid-qendrat më të mëdha në vend. Personeli administrativ dhe teknik i saj ngriti zërin në shenjë revolte se nuk po shpërblehen për punën e tyre, njëjtë siç u shpërblye personeli mjekësor.

“Me vendim të qeverisë u pagua shpërblim në para për të gjithë të punësuarit në Covid-qendra, nga të cilët vetëm ne 195 të punësuar ishim të përjashtuar dhe diskriminuar. Me vendim të qeverisë duam të themi se në përputhje me urdhrin e dhënë që nga fillimi i pandemisë ne vazhdimisht jemi të kyçur në procesin e punës dhe mbështetjes me pacientët me Covid, pa të drejtën e pushimit vjetor dhe mungesave”, tha Mirjana Tasiq – e punësuar në administratën e spitalit.

Revolti do të vazhdojë deri sa të përmbushen kërkesat dhe të drejtat e tyre, thonë administratorët, duke treguar po ashtu se po bëhen përpjekje nga drejtoria, por pa rezultat.

Drejtori i “8 shtatorit”, Hristijan Kostov, konsideron se të gjithë meritojnë shpërblime, por shton se angazhimi administratës spitalore nuk mund të krahasohet me atë të personelit mjekësor që është në garë për të shpëtua jetë njerëzish.

 “Si drejtor i kësaj shtëpie shëndeti konsideroj që të punësuarit në administratë duhet të marrin të paktën gjysmën e asaj që kanë marrë infermieret, punëtorët teknik, mjekët dhe të tjerët. Pjesën më të madhe të parave e kam siguruar përmes donacioneve, ndërsa një pjesë më të vogël e pres nga Fondi shëndetësor dhe Ministria e Shëndetësisë. Nuk do të ishte në rregull të jenë njëjtë, pas asnjë dallim”, theksoi Hristijan Kostov – Drejtor i Spitalit “8 Shtatori”.

Duke qenë se mjekët dhe personeli tjetër shëndetësor ka marrë shpërblim prej 28 mijë denarësh, Kostov vlerëson se administrata duhet të marrë gjysmën e kësaj shume, pra 14 mijë denarë.

Pyetëm edhe Ministrinë e Shëndetësisë për revoltën e administratorëve në “8 shatatori”, e nga atje thonë se Ministria nuk i ka bërë listat dhe nuk ka marrë vendime se kush do të paguhet e kush jo, por këtë vendim e kanë marrë vetë drejtuesit e spitaleve, pra kovid-qendrave.