Edhe 26 raste të reja me Kovid-19 në Kosovë, gjithsej 449 të infektuar

Në Kosovë gjatë ditës së djeshme janë regjistruar 26 raste të reja të të sëmurëve nga Kovid-19, si dhe tetë persona të cilët janë shëruar, pasi paraprakisht ishin diagnostikuar si të infektuar nga virusi korona, bëri të ditur mbrëmë Instituti i Shëndetit Publik të Kosovës (ISHPK) në raportin e tij 24-orësh për gjendjen me infeksionin në vend.

Siç informon korrespondenti i MIA-s nga Prishtina, bashkë me rastet e reja, numri zyrtar i të infektuarve në Kosovë tani është 449, përderisa si të shëruar, përfshirë edhe tetë të djeshmit, sipas metodave të shpallura nga Organizata Botërore e Shëndetësisë, konsiderohen 79 persona.

Të enjten ishin regjistruar edhe dy raste të reja të vdekjes të të sëmurëve nga Kovid-19, me çka numri i viktimave nga infeksioni në Kosovë u rrit në 11. Personat të cilët kishin ndërruar dje, gra të moshës 73 dhe 71-vjeçare, si edhe nëntë viktimat e tjera, kishin pasur edhe sëmundje të tjera shoqëruese.

Në Laboratorin e Mikrobiologjisë Molekulare të ISHPK-së dje janë testuar mostrat e 195 personave për të cilët ekziston dyshimi se janë bartës të mundshëm të virusit. Numri i përgjithshëm i të testuarve nga 8 shkurti, e deri më dje, është 3.915.