13 shkurti i vitit 2019 ishte ditë fatale për 51 pasagjerët në autobusin e “Durmo Turs” i cili qarkullonte në relacion Shkup-Gostivar. Rreth orës 17, për arsye që ende të padefinuara, autobusi u përmbys në autostradën Tetovë-Shkup afër fshatit Llaskarcë. Autobusi humbi kontrollin dhe ra në humnerë, pasi theu gardhin mbrojtës në autostradë. 16 pasagjerë humbën jetën, kurse 35 prej tyre morën lëndime të rënda.
Në kujtim të të ndjerëve dhe në shenjë solidariteti me familjet e tyre, kryetari i Komunës së Gostivarit, Arben Taravari dhe bashkëshortja e tij vendosën lule në vendin e aksidentit. Taravari nuk shpreson që ky rast të ketë epilog të drejtë, sepse njerëz nga pushteti janë pjesë e kompanisë që akuzohet.
“Në regjimet hibride epilog ka vetëm për rastet kur janë vjedhur 10 qebapë, kur diçka vidhet në treg ose kur ka ryshfet prej 1000-2000-3000 denarëve. Për këto raste menjëherë ka epilog gjyqësor. Por, për rastet e këtilla, sidomos kur ekziston dyshim se pronarët e kompanisë janë pjesë e partive në pushtet…këtu ekziston dyshim se pronarët ose aksionarët janë anëtarë të BDI-së… nuk do të ketë epilog derisa nuk ka ndërrim të pushtetit”, deklaroi Arben Taravari – kryetar i Komunës së Gostivarit.
Dhjetëra qytetarë marshuan nga pagesa rrugore në Gostivar deri në sheshin e qytetit për kujtimin e përjetshëm të viktimave. Nisma ka rrjedhur nga disa klube sportive me qëllim që të përcillet mesazh deri te pjesëmarrësit dhe personat përgjegjës për sigurinë në trafik – të ketë ndërgjegje më të madhe dhe të respektohen ligjet.
Edhe dy vjet pas aksidentit ende po zgjat procesi gjyqësor në të cilin janë akuzuar gjashtë persona dhe ende vazhdon përcaktimi i përgjegjësisë dhe rrethanave që çuan deri në këtë tragjedi. Të akuzuar janë pronari i “Durmo Turs-it”, Durmish Beluli, personi përgjegjës për transportin në kompani, Remzi Miftari, shoferi i autobusit, Manoil Trifunovski, si dhe tre të punësuar të tjerë në stacionin për kontroll teknik. Tre të parët ngarkohen për vepra të rënda kundër sigurisë së njerëzve dhe pasurisë në trafik, ndërsa të tjerët – për bashkëpunim në veprën e njëjtë. Procesi gjyqësor udhëhiqet në Gjykatën Themelore Penale në Shkup dhe është në procedurë dëshmuese. Muajin e ardhshëm pritet të hyjë në fazën përfundimtare.