Duraku i bindur për ndryshimet kushtetuese: “Është e pamundur të ekzistojë si shtet nëse nuk bëhen”

Ndryshimet kushtetuese do të realizohen pas zgjedhjeve. Deshëm apo nuk deshëm, ato do të bëhen. Kështu është i bindur anëtari i këshillit të përgjithshëm i BDI-së, njëherit bartës liste i Frontit Europian në zonën 2, Sadulla Duraku. I ftuar në Click Plus, Duraku thotë se këto zvarritje nga VMRO bëhen vetëm për përfitime politike para zgjedhjeve por pasi të përfundojnë zgjedhjet, edhe VMRO-ja do të pranojë këto ndryshime të nevojshme.

“VMRO-ja nëse janë tamam burrështetas siç duhet, se e duan RMV-në, ata i bëjnë ndryshimet kushtetuese. E ata që duan të përfitojnë për një ditë ose dy ditë për politikë ditore, ata nuk i bëjnë ndryshimet kushtetuese. Prandaj ne e kemi bërë frontin. Prandaj tani kemi një mision që duhet ta kryejmë. Nuk mundet që këtë shtet një VMRO ose një LSDM ka të dojë ta çojë”, tha Sadulla Duraku.
– E BDI-ja mundet?
“Mundet BDI-ja”, u shpreh ai.

Duraku thotë se nëse nuk realizohen të njejtat, nuk mund të ekzistojë as shteti. Dërgon porosi që ky shtet nuk është vetëm i VMRO-së apo LSDM-së, por se është edhe i komuniteteve tjera.

“Ky shtet nuk është i atyre vetëm, është edhe i shqiptarëve, është edhe i romëve. Ata si i dalin zot këtij vendi sikur është vetëm i atyre. Ata e kanë gabim, shumë gabim e kanë. Duhet të ndryshojnë qasjen ato, edhe pse e kanë ndryshuar”, deklaroi Duraku.
– Sepse përndryshe çka?
“Nuk mund të ekzistojë ky shtet”
-Duhet të ma spjegoni çfarë i bie kjo, po bëni kërcënim publik, ose e ndryshojmë Kushtetutën ose s’ka shtet. Qysh?
“Po është e pamundur të ekzistojë. Do të bëhen ndryshimet kushtetuese”, theksoi ai.

Për t’u realizuar kjo, Duraku kërkon mbështetje sa më të madhe për Frontin Europian për fitore siç e quan, të fuqishme, me qëllim për ta kushtëzuar partnerin e koalicionit me ndryshimet kushtetuese.