Të revoltuar për mos shitjen dhe çmimin e ulët të duhanit, duhanxhinjtë edhe sot ia treguan hallet ministrit e Bujqësisë Arjanit Hoxha. Xhevat Saliu, kryetar i shoqatës së duhanxhinjve të Karshiakës tha se prodhuesit e duhanit nga Karshiaka nuk përfillen. Gjithë duhanin që e kanë punuar gjatë verës u ka mbetur nëpër shtëpia.
“Nuk na afirmojnë askund, kemi mbetur askund. Këto firma vetëm koncentrohen në Prilep ndërsa ka edhe Karshiaka duhan, edhe duhet të merret parasysh. Unë i thash edhe ministrit duhet të bisedohet dhe të shihet se ka duhanxhinj e u ka mbet duhani nëpër shpija”, tha Xhevat Saliu – kryetar i duhanxhinjve në Karishiakë.
Ministri i Bujqësisë Arijanit Hoxha pranon se ky vit ka qenë i keq për prodhuesit e duhanit, por premton se e gjithë duhani që u ka mbetur në shtëpi do të blihet.
“Ka përfunduar blerja e 21 milion kilogramëve nga 23 milion që janë të dakorduara. Në ditën e nesërme presim që të përfundojë pjesa e marrëveshjes të duhanit që duhet të blihet dhe realisht pas asaj vijon procesi më i vështirë që pritet më shumë nga prodhuesit e duhanit të blihet teprica e duhanit e cila është prodhuar jashtë marrëveshjeve që i kanë lidhur prodhuesit me kompanitë blerëse”, deklaroi Arjanit Hoxha – Ministër i Bujqësisë.
Ministria e bujqësisë me pakon e pestë ekonomike do të destinojë 5 milion euro për prodhuesit e duhanit. Këto mjete do të ndahen kur do të përfundojë blerja e duhanit për këtë sezon.