Presidenti amerikan Donald Trump deklaroi mbrëmë se shpreson për përfundimin e luftës me Iranin, ndërsa „Axios“ raportoi se ai pritet të takohet të martën me liderët e vendeve të Gjirit Persik, në margjinat e Asamblesë së Përgjithshme të OKB-së. Deklaratat e tij vijnë në kohën kur lufta me Iranin ka hyrë në muajin e shtatë, ndërsa fundi i saj ende nuk është në horizont.
„Axios“ raportoi mbrëmë se takimi i Trumpit me liderët e Gjirit Persik, që pritet të zhvillohet javën e ardhshme në Nju Jork, do të fokusohet në planet e SHBA-së për strategjinë pas luftës. Media i referohet burimeve anonime.
Në raport thuhet se Trump do të takohet me liderët ose ministrat e Jashtëm të vendeve anëtare të Këshillit të Bashkëpunimit të Gjirit (GCC): Arabisë Saudite, Emirateve të Bashkuara Arabe, Katarit, Bahreinit, Kuvajtit dhe Omanit.
Departamenti i Shtetit dhe Shtëpia e Bardhë nuk iu përgjigjën kërkesave për koment.
Rritja e çmimeve të naftës dhe gazit si pasojë e luftës së SHBA-së dhe Izraelit kundër Iranit është bërë një çështje e rëndësishme për Partinë Republikane të Trumpit, përpara zgjedhjeve për Kongres në nëntor.