Do të rriten taksat ose jo? Bytyqi: Të pasurit duhet të paguajnë dhe t’u kthejnë më të varfërve

Zëvendëskryeministri për çështje ekonomike, Fatmir Bytyqi, është i hapur për të shqyrtuar sygjerimin për rritje të lehtë të tatimeve me qëllim “shërimin e ekonomisë”.

“Nëse reforma tatimore nënkupton futjen e tatimit progresiv, unë them pse jo?! Treguam se në krizë disa të pasur u bënë edhe më të pasur dhe vlerësoj se edhe për shkak të bindjeve ideologjike, duhet të kemi tatim progresiv. Të pasurit duhet të paguajnë dhe t’u kthejnë më të varfërve. Po nëse nënkupton tatim i ri për më të varfërit, them jo! Sepse atyre u kemi borxh që të dalin nga pragu i varfërisë dhe të fillojnë të jetojnë me dinjitet”, u shpreh ai.

Akademiku Taki Fiti, dje duke folur për shmangien e rrezikut të paqëndrueshmërisë financiare, përveç që propozoi rritje të lehtë të tatimeve, po ashtu kërkon që qeveria të shkurtojë shpenzimet.

“Ne mundemi konsolidimin financiar ta bëjmë me shkurtim të harxhimeve qeveritare, veçanërisht ato harxhime joproduktive, siç janë ndërtesat, mobilje, makina dhe gjithashtu eventualisht rritje të tatimeve. Unë them progresim të lehtë, nuk mundet barra tatimore në Maqedoni të rritet aq shumë, mes tjerash duhet mbajtur llogari edhe për shkallën tatimore dhe lartësinë e tyre edhe në rajon”, tha akademik Fiti.

Ministri i Financave, Fatmir Besimi, në konferencën e djeshme shkencore tregoi se tashmë ekziston një strategji për reformën tatimore, por nuk zbuloi nëse dhe për cilat tatime do të ketë rritje. Për të njëjtën, tha ai, kanë filluar debatet publike për drejtësinë dhe efikasitetin e sistemit tatimor në mbledhjen e të ardhurave, si dhe për rritjen e transparencës dhe cilësisë./TV21