Kryeministri është plot shpresa, por njëkohësisht edhe plot pikëpyetje nëse do të fillojmë ose jo bisedimet integruese për në Bashkimin Evropian. Vetoja që mund ta vendosë Bullgaria, nuk po e lënë të japë një përgjigje të prerë se a do të nisin bisedimet në dhjetor.
Ai, zëvendëskryeministri Dimitrov dhe ministri i Jashtëm Osmani, sot u takuan online me Kryetarin e Këshillit Evropian, Komisionarin e zgjerimit, nënkryetarin e Komisionit evropian dhe Kryetarin e Parlamentit, të cilëve u kanë folur për shpresat e Shkupit.
“Në bisedimet me të gjithë bashkëbiseduesit shprehëm shpresën se kjo gatishmëri e Maqedonisë së Veriut do të formalizohet me miratimin e kornizës për bisedime në fillim të muajit të ardhshëm, pas çka do të vijojë edhe konferenca e parë ndërqeveritare deri në fund të vitit”, tha kryeministri Zoran Zaev.
Krerët evropianë kanë shprehur pritshmërinë e tyre për mbajtjen e konferencës ndërqeveritare, tregon i pari i qeverisë.
“Ata presin që në periudhën në vijim do të përfundojnë të gjitha përgatitjet që të mbahet konferenca e parë ndërqeveritare që do të shënonte fillimin e mbylljes së kapitujve për anëtarësimin tonë në BE”, u shpreh Zoran Zaev, kryeministër.
Por përskaj shpresës, ka edhe pesimizëm për dhjetorin.
“Besoj me të vërtetë se proceset do të zhvillohen pozitivisht edhe pse themi dhe ndajmë me qytetarët se nuk e përjashtojmë mundësinë që të mos vazhdohet me këtë hap pikërisht tani deri në fund të dhjetorit sepse e dini që vendimi është konsensual, çdo vend anëtar mund të kufizojë vazhdimin e proceseve më tej, por sinqerisht besoj se kjo nuk është në interes as të popullit bullgar, as Kryeministrit Borisov”, potencoi Zoran Zaev – kryeministër.
Liderët e BE-së çështjet mes Maqedonisë dhe Bullgarisë i shohin si bilaterale, tha Zaev, duke shtuar se kjo nuk do të thotë se nuk do të ketë përpjekje për zgjidhje.
Kryeministri thotë se do të bëhet gjithçka që sa më herët që çështja mes Shkupit dhe Sofjes të zgjidhet. U kanë thënë krerëve evropianë se Qeveria mbetet e përkushtuar për fqinjësinë e mirë, sipas marrëveshjeve, si me Greqinë po ashtu edhe Bullgarinë.