Deputetja më e re dhe deputeti më i vjetër, Nikollovski i pëkushtuar për pensionistët, Qazimi për të rinjtë

Para se të bëhej deputet, ishte aktiv në shoqëri duke kërkuar të drejtat për pensionistët. Edhe pse i thyer në moshë, 72-vjeçari Ilija Nikollovski thotë se ndihet më i ri se shumë deputetë të tjerë.

“Unë mund të jem vetëm më i moshuar, edhe pse ndihem shumë më i ri se sa shumë deputetë sepse dikush është i pensionuar në aspekt intelektuar, kurse unë ende ndihem i aftë në aspekt intelektual”, tha Ilija Nikollovski.

Edhe pse ka ndryshuar pozitën në shoqëri, nga një aktivist në deputet, Nikollovski vazhdon të përkushtohet për të realizuar qëllimet e njëjta e që janë rritja e pensioneve.

“Për shkak se jam përfaqësues i pensionistëve, do të përkushtohem për përmirësimin e statusit juridik dhe social të pensionistëve. Këtu ka shumë fusha të cilat duhet të përmirësohen, por megjithatë nuk janë detyrë e rëndësishme. Pasi detyrë kryesore tash është procesi euro-atlantik dhe zgjidhja e problemeve me virusin Covid-19, sepse jo vetëm pensionistët, por të gjithë janë dëmtuar nga virusi Covid-19”, u shpreh deputeti 72 vjeçar Ilija Nikollovski.

Në Kuvend do të ulet edhe studentja, 23-vjeçare, Artina Qazimi. Gjysmë shekulli dallojnë, por mosha nuk përbën problem që edhe Qazimi të ulet në karrigen e Kuvendit.

“Moshatarët e mi ishin të interesuar për modë, sport apo muzikë, unë kam qenë e interesuar për lajme, debate politike”, deklaroi deputetja 23 vjeçare Artina Qazimi.

Do të ndajnë të njëjtën sallë dhe minutazh në foltoren e Kuvendit, por i dallojnë qëllimet. 23-vjeçarja do të luftojë për të siguruar vende pune për të diplomuarit.

“Unë edhe pse i përkas rinisë, jam e re, kam 23 vjet, shqetësimi më i madh i imi është se të rinjtë e vendit tonë, shumica janë edhe të diplomuar, ata e kanë marrë rrugën drejt shteteve të Perëndimit. Unë me aftësitë e mija dhe me ndihmën e institucioneve do të mundohem ta ndal emigrimin dhe çdo i ri të punësohet në vendlindje dhe në vendin adekuat”, theksoi deputetja 23 vjeçare, Artina Qazimi.

Për Artinën është mandati i parë i deputetes, kurse për Nikollovskin ky është mandati i dytë dhe është deputeti i vetëm i Partisë së pensionistëve si pjesë e koalicionit “Mundemi”. Në Kuvend do të ulet edhe një bashkëmoshatar i Nikollovskit, Stojan Millanov ndërkaq Qazimi mbetet e pashoqe, pasi tre deputetët e tjerë që vijnë pas saj janë të moshës 28 dhe 29-vjeçare.